ጥያቄና መልስ

👉ጥያቄ፦ #ንስሐ ከመግባታችን በፊት ምን ማድረግ አለብን?

መልስ፦

ንስሐ ለመግባት ከሚፈልግ አንድ ክርስቲያን በመጀመሪያ የሚጠበቀው ፡-

1.  በቅድሚያ ኅጢአት መሥራቱን አምኖ ለራሱ ሕሊና መናዘዝ (ከልብ መፀፀት)።

2.  ስለሠራው ኅጢአት ወይም በደል እየተፀፀተ ጧት ማታ በደሉን በፀሎትና በልመና ለፈጣሪው መናዘዝና ኅጢአትን በእግዚአብሔር ፊት ማመን (መዝ50 ፣ ዳን9፥5፣ ነህ1፥6-7)

3.  ኅጢአትን (በደልን) ለካህን መናዘዝና ንስሐ መግባት። ካህኑ የእግዚአብሔር አገልጋይና እንደራሴ ስለሆነ የሠራነውን ኅጢአት ለካህኑ በመናዘዝ ንስሐ መግባት፤ ኅጢአታችን እንዲሠረይልን በእግዚአብሔር ፊት ንስሐ መግባትና መናዘዝ ማለት ነው። (ኢያሱ7፥19 ማቴ3፥6 ዘሌ5፥5-6 የሐዋ19፥18)

4. የበደልናቸውንና የበደሉንን ሁሉ ይቅር በማለት የጥል ግድግዳ አፍርሰን በፍቅር አሸንፈን ስለዘለዓለማዊ ሕይወት ብለን በፍጹም ሕሊና በሰላም መኖር ነው።

4. ተመልሶ በኅጢአት ላለመውደቅ አዘውትሮ የንስሐ አባትን ወይም የሚቀርቡትን የሃይማኖት መምህር ማማከር፣ ምክር ማግኘት በታቻለ መጠን መጸለይ፣ ወደ ቤተክርስቲያን መሄድና ቃለ እግዚአብሔር መስማት፣ በቤትም ውስጥ ቢሆን መንፈሳዊ መዝሙርና ትምሕርት ማዳመጥ አስፈላጊ እንደሆነ የምናስገነዝበው ለጠየቁን ምዕመን ብቻ ሳይሆን ለሁሉም ክርስቲያን እንዲጠቅም ነው።

የንስሓ አባትን በሚመለከት ፦

ለመንፈሳዊ ልጆቹ (ለመንጋው ጥበቃ) የማያንቀላፋና ዘወትር ቁጥጥር እና ክትትል የሚያደርግ አባት መያዝ እንደሚገባ እንመክራለን። ስለዚህ ይመክረኛል ያስተምረኛል ያሉትን የንስሓ አባት የሚሆን ካህን በአካባቢዎ ካሉ  ይያዙ፤ በአከባቢዎ  ማግኘት የማይችሉ ከሆነ በራስዎትም ሆነ በሚያምኑት ሰው በኩል ያገኙዋቸውን እውነተኛ ካህን በርቀትም ቢሆን ይያዙ፤ ወይም ደግሞ እኛ በህይወታቸው ምሳሌ ይሆናሉ ብለን ከመረጥንልዎ በድረገፃችን በሚያገኙት ስልክ ቁጥር ደውለው  ንስሓ አባት በማድረግ መያዝ ይችላሉ።

በተጨማሪም ለጠያቂያችንም ሆነ ለሌላው ሁሉ ምክር የምንሰጠው ምናልባት የሰራነውን ኀጢአት ሁሉ ለመደበኛ የንስሓ አባታችን ለመናዘዝ የምናፍርበት ወይም በካህኑ ላይ እምነት ቢያጣ ወይም ምስጢር ይባክንብኛል ብሎ ከተጠራጠረ፤ ያ ነገር ደግሞ በህይወቱ ጉዳት ያደርስብኛል ብሎ ካሰበ ከተቻለ አባቱን በደንብ አነጋግሮ መተማመን ላይ ቢደርስ፤ ይህን ማድረግ ካልቻለ ደግሞ ስርአታዊ መንገድ ተጠቅመን በመንፈሳዊ ጥበብና በትህትና ሁነን ተሰናብተን ፤ ሳንጠራጠር ከልብ የምናምናቸውን ሌላ አባት መርጠን መያዝ ይገባናል። ይህን የምንልበት ምክንያት ብዙዎቹ ምእመናን ለንስሓ አባቶቻቸው ግልፅ ሆነው የሰሩትን በደል ለመንገር የማይችሉበት ዋናው ምክንያት ምስጢር ይባክንብናል ብለው ከነኀጢአታቸው የሚኖሩ አሉና ነው፤ አንዳንዶቹ ደግሞ ለአባቶቻቸው ግልፅ ለመሆን በአካባቢያቸው በማህበራዊ ህይወት ከመንፈሳዊ አባቶቻቸው ጋር አብረው ስለሚኖሩ የመተፋፈርም ነገር ስለሚያጋጥማቸው በዚህም ምክንያት የሚሳቀቁ ምእመናን እንዳሉ መረጃው ስላለን፤ ከዚህ ሁሉ ስጋት ነፃ ለመሆን የሚያምኑበትን እና የማይጠራጠሩበትን አባት መያዝ እንደሚገባቸው በአፅንዎት እንመክራለን። ለዘላለማዊ የነፍስ ድህነት ጉዳይ የምንሰራውና የምናደርገው ተጋድሎ በስጋዊ አመለካከት ወይም ምድራዊ በሆነ አሰራር የምንኖረው ሂደት ስላልሆነ ልዩ ጥንቃቄ ያስፈልገዋል።

2. ንስሓ ከገቡ በኋላ ማድረግ ያለብዎት፦

አንድ ክርስቲያን በኅጢአት የጎደፈውን ሰውነቱን ከታጠበ በኋላ መላ ህይወቱ ንፁህ ስለሆነ ለማንኛውም መንፈሳዊ አገልግሎት መንገዱ ሁሉ ቀና ስለሆነ ማድረግ ያለበት ምን እንደሆነ የምናስረዳዎት፦

1ኛ/ ከምንም በላይ ዳግም ወደ ኀጢአት ተመልሰው የተቀደሰውን ህይወትዎትን እንዳያረክሱት መጠንቀቅ፣

2ኛ/ እግዚአብሔር ቢፈቅድልዎት በቅዱስ ቁርባን መወሰን፣ አቅምዎት በሚፈቅደው መጠን ሳያቋርጡ እና ሳይሰለቹ መፆም፣ መፀለይ፣ እና መስገድ፣

3ኛ/ በአቅምዎት ከሚያገኙት ነገር ለድሆችና ለእግዚአብሔር የሚገባውን አስራተ በኩራት ማዋጣት፣

4ኛ/ ዘወትር ከአባቶች ምክር እና መታዘዝ አለመራቅ፣ በፕሮግራም ወደ ቤተክርስቲያን እየቀረቡ ቃለ እግዚአብሔር መማር፣

5ኛ ሁሌ እንደቅርብ አስተማሪና መካሪ ሁነው የሚያገለግሎትን መንፈሳዊያን መፃህፍትን ማንበብ፣ ከዚህም በላይ በኑሮዎት ውስጥ፣ በስራ ቦታ፣ በማህበራዊ ጉዳይ ከሰው ልጅ ሁሉ ጋር በሰላም እና በፍቅር በትዕግስት እና በጥበብ ለመኖር ድርሻዎትን መወጣት።

እነዚህን ሁሉ እና ሌሎችንም መንፈሳዊ ነገሮችን አጠቃሎ ለመስራት የሚቻለው ሰው ህይወቱ በንስሓ ሲታደስ ስለሆነ ከዚህ በኋላ እግዚአብሔር የእርስዎን ህይወት በንፅህና በቅድስና እንደሚጠብቃት በማመን ከዚህ በላይ የተሰጠዎትን መንፈሳዊ ምክር በስራ ላይ ለማዋል እንዲችሉ እግዚአብሔር ይርዳዎት።

በተጨማሪም፤ ስለንስሓ ትምህርት በድረገፃችን ላይ የተላለፉና እየተላለፉ ያሉትን ተከታታይ ትምህርቶች ይህን ሊንክ በመጫን ያንብቡ።

ተጨማሪ መንፈሳዊ ምክርና ትምህርት ድረገጻችን Yohannesneseha.org/ጥያቄና-መልስ ላይ ያገኛሉ

👉ጥያቄ፦ #ንስሐ ሳይገባ #ሱባዔ መግባት ይቻላል ውይ?

መልስ፦ ጠያቂያችን፤ ሱባኤ ለመግባት ከሁሉ በፊት ስለ ስባኤ ምስጢራዊ ትርጒም እና በሱባኤ ስለሚገኝበት መንፈሳዊ ጥቅም መረዳት አለብን።  ሱባኤ ማለት በግዕዝ  ቋንቋ 7 ቁጥርን የሚያመለክት ሲሆን ይህ 7 ቁጥር ደግሞ የአንድ ሱባኤ ጊዜ ማለት ነው። 7 ቁጥር በዕብራዊያን ዘንድ ፍጹም ቁጥር ነው። የቃሉ ምስጢራዊ ትንታኔ ይህ ከሆነ፤ ሱባኤ የተጀመረው በአባታችን በአዳም ነው።  አባታችን አዳም  7  አመት ከ1ወር ከ 17 ቀን በገነት ውስጥ በደስታ ከኖረ በኋላ አታድርግ የተባለውን ትዕዛዝ በማድረጉና አትብላ የተባለውን ዕፀበለስ በመብላቱ ከገነት ርስቱ መባረሩ ምክንያት ስለ ስራው በደል ተፀፅቶ ወደ ፈጣሪው በማልቀሱና በመጮሁ ምክንያት ከፈጣሪው ዘንድ  ይቅርታን ያገኝ ዘንድ 5 ሱባኤ ማለትም 35 ቀናትን በሱባኤ ተወስኖ ወደፈጣሪው ያቀረበው ልመና ተቀባይነት አግኝቶ ከፈጣሪው ዘንድ ከልጅ ልጁ ተወልዶ እንደሚያድነው ቃል ኪዳን ተገብቶለታል። ስለዚህ ከአባታችን ከአዳም ጀምሮ በኀጢዓትና በልዩ ልዩ ምክንያት የሱባኤ ጊዜ እየወሰኑ ከፈጣሪያቸው ዘንድ ምህረትን እና ይቅርታን አግኝተውበታል። 

ሱባኤ የሚገባው በ2 ምክንያት ነው:- 1ኛው ማንኛውም ክርስቲያን የኀጢአት ፈተና ደርሶበት የበደለውን በደል አስቦ በመፀፀት ከሰውና ከማህበራዊ ኑሮ ራሱን ደብቆና ሰውሮ በለቅሶ በፀሎት ፈጣሪውን ይቅርታ የሚጠይቅበት ሂደት ነው።  2ኛው ደግሞ ማንኛውም ክርስቲያን ፀጋውን ለማሳደግና ወደ እግዚአብሔር የሚያቀርበው ልዩ ልመና ሲኖረው ጊዜ ወስኖ ቦታ ለይቶ ሱባኤ ይገባል ማለት ነው። በፆም በፀሎት ተወስኖም ከፈጣሪው ጋር ይነጋገራል። በጠየቀውና በለመነው ፍፁም ክርስቲያናዊ ሕይወት አንፃር ከእግዚአብሔር ዘንድ ለግል ህይወቱና ለቤተሰቡ፣ ለወገንና ለሀገርም የሚጠቅም በጐ ምላሽ ሊያገኝ ይችላል።

ሌላው የሱባኤ አስፈላጊነት ፤ እግዚአብሔር አምላክ ስላደረገልን ነገር ሁሉ እና ስለቸርነቱ ብዛት ምስጋና ለማቅረብ፣ ወደፊትም ጠብቆቱና መግቦቱ እንዳይለየን ለመማፀን ፣ ከእናታችን ከድንግል ማርያምና ከቅዱሳን ሁሉ በረከት ለማግኘት፣ በግል ህይወትም ሆነ በሀገር ላይ ከተቃጣው መቅሰፍት ለመዳን፣ በሃይማኖትና በሥነምግባር ፀንተን በፆም በፀሎት እንድንተጋ የሚዋጋንን ጥንተ ጠላታችንን ዲያብሎስን ድል ለመንሳት፣ የተሰወረና የረቀቀ ምስጢር እንዲገለጽልን በመሳሰሉት መንፈሳዊ ጉዳዮች ሰባኤ መግባት የምንችል መሆኑን በቀኖና ቤተክርስቲያን ታዟል።

ሱባኤ ለመግባት የሚደረግ ቅድመ ዝግጅት ፤ በግላችን በሰራነው በደልም ሆነ ስለሀገርና ስለወገን ከእግዚአብሔር ዘንድ ምህረት ለመጠየቅ ሱባኤ ለመግባት ባሰብን ጊዜ፦ 

1/   ህሊናዊና አካላዊ ቁርጠኝነትና ስነልቦናዊ ውሳኔን ይጠይቃል። 

2/  ሱባኤ የምንገባበት ምክንያት እንዴትና ለምን እንደሆነ ከቤተክርስቲያን አባቶች ጋር መነጋገርና ምክር መቀበል፣ ንስኀ ያልገባበት ጥፋት ካለም ተናዞ ቀኖና መቀበል ያስፈልጋል።

3/  በሱባኤ የምንቆይበት ጊዜ ምን ያህል ሰባኤ እንደሆነ፣ ለምን ያህል ጊዜ እንደሆነ፣ እና የሱባኤውን ቦታ (በአትን) መወስን ያስፈልጋል። 

4/   በሱባኤ ጊዜ የምናደርጋቸውን መንፈሳዊ ስርዓት ማለትም እንዴት እንደምንፆም ፣ እንዴት እንደምንፀልይ፣ እንዴት እንደምንሰግድና በመሳሰሉት በስርዓተ ቀኖና መሰረት መንፈሳዊ ግንዛቤ እንዲኖረን ያስፈልጋል። 

5/    ሱባኤ በገባን ጊዜ በግል ህይወትና በቤተሰብ ጉዳይ ወይም በማህበራዊ ጉዳይ የሚያሰናክል ፈተና እንዳይመጣብን አስቀድመን ሁኔታዎችን ማስተካከል ያስፈልጋል።

6/   ሱባኤ በገባን ጊዜም እንዴት መተኛት እንዳለብን ምን መልበስ እንዳለብን ባጠቃላይ በሱባኤ የምናሳልፍበት ጊዜያችን የሚያስፈልገንን እና የማያስፈልገንን ነገር ለይተን ለማወቅ ከቤተክርስቲያን አባቶች መመሪያ መቀበል አለብን። 

ይህን ሁሉና የመሳሰሉትን ሱባኤ ከመግባ በፊት ልናሰባቸውና በሱባኤ ወቅት ልናደርጋቸው የሚገቡ ጥንቃቄዎች ናቸው። 

ሱባኤ ከጨረስን በኋላ ልናደርጋቸው የሚገቡ ጥንቃቄዎች ደግሞ፦

1/   ሱባኤ የገባንበት ምክንያት ኀጢአት ከሆነ ደግመን ላለማድረግ በተቻለ መጠን በመንፈሳዊ ተጋድሎ ራሳችንን ለበለጠ የሃይማኖት ፅናት ማትጋት ነው። 

2/ ሱባኤ በገባንበት ጊዜ ከእግዚአብሔር ያገኘነው በጎ ምላሽ ካለም የበለጠ የእግዚአብሔር ፀጋ እንዲበዛልን ከእግዚአብሔር ጋር ያለንን ግንኙነት አጠናክረን መቀጠል ነው።

3/   ማንኛውም ክርስቲያን ቦታና ጊዜ ላይቶ በሱባኤ ፈጣሪውን የሚለምን ከሆነ በፀጋ እያደገ ከመጣ ብዙ ጊዜ ለውድቀት ከሚያበቁት የኀጢአት ምክንያቶች መራቅ።

4/   በፆም በፀሎት በቅዱስ ቁርባን በአጠቃላይ በክርስቲያናዊ ስነምግባር መንፈሳዊ ጉዞን መቀጠል።

5/   ሥጋዊ ፍላጎትን እና ምኞትን ገዝቶ ፈቃደ ሥጋን ለፈቃደ ነፍስ አስገዝቶ የትሩፋት ሥራ መስራት። 

6/  በአጠቃላይ አለማዊ ሰዎች ከሚሰሯቸው ስራዎች ሁሉ እርቆ በመንፈሳዊ አላማ ፀንቶ መኖርን ይጠይቃል። 

እነዚህ ከላይ የዘረዘርናቸው ምክር የሚሰጠው በአለም እየኖሩ በሱባኤ እግዚአብሔርን ለሚለምኑ እውነተኛ ክርስቲያኖች እንጂ ለገዳማውያን ወይም በምናኔ ለሚኖሩ መነኮሳት አይደለም፤ የነሱ ደግሞ ከዚህ ለየት ያለ ቀኖናዊ ስርዓት ስላላቸው ነው።

ስለዚህ ጠያቂያችን ሃሳቡን በዚህ ተረድተው ፤ ለሱባኤ ወደ ገዳም ለመሄድ ያሰቡትን መንፈሳዊ አላማ በሰላም ፈፀመው የእግዚአብሔርንም በረከት እና መልስ አግኝተው እንዲመለሱ እየተመኘን፤ በገዳም በፍጹም እምነት ሆነው እንዲጸልዩና ለረዥም ጊዜ በቦታው የቆዩ የእግዚአብሔር ፀጋ አብዝቶ ያደረባቸው አባቶች ስለሚኖሩ ወደነርሱ ቀርበው ትምህርትና ምክር ማግኘት እንዳለብዎምእንመክራለን። 

በአጠቃላይ ጠያቂያችንም ሆኑ የዚህ የዮሐንስ ንስኀ ድረገፅ መንፈሳዊ ፕሮግራም ተከታታይ አባሎቻችን ሁላችሁም፤ ስለ ሱባኤ መጠነኛ ግንዛቤ እንዲኖራችሁ በዚህች አጭር ፅሁፍ መልዕክት የላክንላችሁ ሲሆን፤ አስፈላጊ ሆኖ ስናገኘው ወደፊት ስለ ሱባኤ አስፈላጊነት መጽሐፍ ቅዱሳዊ አስተምሮ ትምህርት በስፋት  እንዲደርሳችሁ ልናደርግ እንችላለን። 

ተጨማሪ መንፈሳዊ ምክርና ትምህርት ድረገጻችን https://yohannesneseha.org/ ላይ ያገኛሉ

👉🏾ስለ #ቅዱስ #ቁርባን፣ የ #ንስሐ ህይወትና ስለ #ዝሙት #ፈተና

👉ጥያቄ፡- ንስሐ ገብቼ መልሼ እሳሳታለሁ፡፡ የዝሙት መንፈስ በጣም ይፈታተነኛል፡፡ እኔ ግን ንስሐ ገብቼ፣ ቅዱስ ሥጋውንና ክቡር ደሙን ለመቀበል እፈልጋለሁ፡፡ ልብስም ገዝቼ ይኼው መቼ ይሆን ከአንተ ቤት የምኖረው እያልኩ እሳላለሁ፡፡ ንስሐ ገብቼ ብቆርብስ ? የድፍረት ኃጢያት ይሆናል ወይ? አንድ አባት ቢያንስ 30 ዓመት ይሙላሽ አሉኝ፡፡ እኔ ግን ከእግዚአብሔር መራቅ አልፈልግም፡፡ ግን መኖር እፈልጋለሁ እስኪ አስረዱኝ በማርያም?

መልስ፡- የጠየቁን ስለ ንስሐ ሕይወት ነው፡፡ በመቀጠልም በንስሐ ሕይወት ስለሚፈፀም የክርስቶስ ቅዱስ ሥጋውና ክቡር ደሙ በሚመለከት ነው፡፡ ጠያቂያችን ከንስሐ የተሸለ ምን የሚያስፈልግ ነገር አለ? ሁልጊዜም ደጋግመን እንደምንለው ኃጢያት ላለመሥራት መጋደሉ፣ መታገሉ መቸስ የማይገኝ ዕድል ነው፡፡ ለሁላችን የማይቻል ነገር ስለሆነ፤ ሁላችንም ፈተና የበዛብን ተክል ስለሆንን፣ የፈለገንን ያህል ብንምል፣ ብንገዘት፣ አጥብቀን ብንጠላው ብንታገለው ሁላችንም ተሰናክለን የምንወድቅበት የጋራ የሆነ ኃጢያት ስላለ በዚያ ተጠልፎ መውደቁ የማይቀር ነገርና መጥፎ ዕድል ሆኖብን እንጂ፤ በዋናነት ከኃጢያት ርቆ መኖር ቁጥር 1 የምንመርጠው የተቀደሰ ተግባር ነው፡፡ ይኼ ሳይቻል ቀርቶ ደግሞ በአንድም፣ በሌላ መንገድም ወይም ከባድ በሆነ ወይም ቀላል በሆነ ኃጢያት በወደቅን ጊዜ፤ ዓይነተኛው መፍትሔ ወደ ንስሐ መምጣት ነው፡፡

በቅዱሳት መጻህፍትም የንስሐ ትርጉም ወይም የንስሐ ታላቅነት ተነግሮናል፡ ንስሐ ማለት ወደ እግዚአብሔር መመለስ ነው፡፡ በሙሉ ልብ በፍፁም እምነት ሆነን ወደ እግዚአብሔር መመለስ ነው.፣ መጸጸት፣ የንስሐ ሕይወት የሚባለው ነገር ይኼ ነው፡፡ መጥምቀ መለኮት ቅዱስ ዮሐንስ ‹‹የጌታን መንገድ አዘጋጁ፣ ጥርጊያውን አቅኑ›› እያለ በመጣ ጊዜ የአዋጁ አብሣሪ ሆኖ ሲመጣ ፤ የመጀመሪያው የስብከቱ አዋጅ ንስሐ ግቡ የማቴዎስ ወንጌል ቁጥር 1 እና 2 ላይ ንስሐ ግቡ መንግሥተ ሰማያት ቀርባለችና፡፡ ሐዋርያትም ጌታ በተነሣ በ 50 ኛው ቀን መንፈስ ቅዱስ ወርዶላቸው 72 ቋንቋም ተገልጦላቸው፣ ገና በጠዋቱ በአይሁድ ዘንድ ቆመው እጅግ የብዙዎቹ ልቡና የተመሰጠበትን ትምሕርት ባስተማሩ ጊዜ ብዙዎቹ አምነው ወዲያውኑ፤ ምን እናደርግ ሲሏቸው? ንስሐ ግቡ፣ እና አምናችሁ ከመጣችሁ ደግሞ የእግዚአብሔር ልጅ ለመሆን ተጠመቁ፡፡ ይኼን ነው እንግዲህ ያስተማረ ማለት ነው፡፡

ስለዚህ የዮሐንስ ትምሕርት የመጀመሪያው ነገር የበር መክፈቻው ቁልፍ ንስሐ ግቡ ነው፡፡ ሁላችንም ከነኃጢያታችን እንዲሁ ተሸፋፍነን እንድንኖር እግዚአብሔር አይፈቅድም፡፡ እና ለንስሐ የእድሜ ገደብ የለውም፡፡ ቅዱስ ቁርባን የእድሜ ገደብ የለውም፡፡ ይኼን በሚመለከት በጣም ብዙ ጊዜ ተነጋግረናል፡፡ መቸስ በእያንዳንዱ ትምሕርት ሳንዘነጋ የምናስታውሰው ነገር ስለ ምስጢረ ቁርባን ነው፡፡ ማንኛውም አማኝ፣ ማንኛውም ክርስቲያን ቅዱስ ቁርባን መቀበል እንዳለበት፡፡ ደጋግመን እንደተነጋገርነው፤ ወንድ ልጅ በ40 ቀኑ፣ ሴት ልጅ በ 80 ቀኗ የእግዚአብሔር ልጅ ሆነው በስመ ክርስትና፣ በቅዱስ ቁርባን ታትመው ልጅነታቸውን ካረጋገጡ በኋላ ከቅዱስ ቁርባን አንድ ቀንም ቢሆን መለየት የለባቸውም ብለናል፡፡

ስለዚህ ጠያቂያችን፤ በተለያየ የሥጋ ድካም፣ በተለያየ የኃጢያት ምክንያት ከሥጋወደሙ መሸሽ ወይም ማቋረጥ አያስፈልግም፡፡ ከእነጭራሹ ደግሞ የምንሰማው ጉድ 30 ዓመት ይሙላችሁ፤ 40 ዓመት ይሙላችሁ፣ 25 ዓመት ይሙላችሁ አይባልም እኮ፡፡ ከምን ጋር በማያያዝ ነው የእድሜ ጣሪያ የምናስቀምጠው? ለደቂቃም፣ ለሴኪንድም ከእግዚአብሔርጋር መለየት የለበትም የሰው ልጅ እያልን ፣ ሁሉም መላ ሕይወታችን በእግዚአብሔር እጅ ውስጥ ነው፡፡ ምናልባት ከእግዚአብሔር ክልል ውጪ፣ እርሱ ከሚገዛው፣ ከሚያስተዳድረው፣ ከፈጠረው ዓለም ውጪ ሆነ ሌላ ዓለም ኖሮ፣ ሌላ አስተዳዳሪ፣ ሌላ ገዢ ኖሮ ከእሱ ተለያይተን ከፈለግን ደግሞ ሌላ አብረን ለመኖር ውል የምንመሠርትበት ኑሮ አይደለም እኮ ይኼ፡፡ በየትኛውም ሰዓት ውስጥ፣ በኃጢያት ውስጥም እያለንም የእግዚአብሔርን ስም እንጠራለን፡፡ ከዚያ ከወደቅንበት የኃጢያት ጉድጓድ፣ የኃጢያት ማጥ ውስጥ ሊያወጣን የሚችለው፤ መፍትሔ እንዲሰጠን እግዚአብሔር ቁልፍ የሆነውም የችግራችን መፍትሔም ያለው ከእግዚአብሔር እጅ ነው፡፡ ስለዚህ ፈፅሞ እንዲህ ዓይነት ትምሕርት ልንሰማም አይገባንም፡፡ ቆይ ልጅ ናችሁ፣ እንዲህ፣ እንዲህ እያሉ የሚሉ ትምሕርት ያነሰው ሰው፣ ወይ ደግሞ ፈጽሞ መንፈሳዊ ምክርና ትምሕርት ተፈልጎ የታጣበት ሰው የሚናገረው የሚያስረዳው የሌለው መጽሐፍትን ጠቅሶ የማያስተምር፣ እንዲህ ዓይነት ካሕን በልብ ወለድ ስለሚናገር ምንቸገረው? እንዳንመነኩስም ገና ነሽ፣ እንዳንቆርብም ገና ነሽ፣ ባይሆን ካሕን ማስተማር ያለበት ሁል ጊዜ ለምዕመናን እግዚአብሔር ቢረዳቸው ከኃጢያት እንዲለዩ ብቻ ነው፡፡ ጊዜ ሳንሰጥ መናገር ያለብን ቅዱስ ቁርባን እንዲቀበሉ፣ እንደዚህ አድርጉ ኃጢያት ላይ ወድቄያለሁ አባቴ ብንባል፤ በል ቶሎ ንስሐ ግባና ወደ እግዚአብሔር ተመለስ፣ ቶሎ ቁረብ ነው ማለት ያለብን፡፡ ሁሌ የምናገረው ቋንቋ ይኼ ነው፡፡የእግዚአብሔር ቅድስና የእኛን የረከሰውን ሕይወት ከኃጢያት ያነፃል፤ የእኛ ኃጢያት ግን የእግዚአብሔርን ቅድስና አያረክስም፡፡

ስለዚህ ጠያቂያችን፤ ቅዱስ ቁርባኑም፣ ፀበሉም፣ መስቀሉም ፣ ቃለእግዚአብሔሩም፣ ቅዳሴውም ይኼ ሁሉ እኛን ከኃጢያት የሚያነፃ ነው እንጂ ጨርሶ የሚያረክስን ኃጢያታችንን የሚያባብስብን ነገር አይደለም ይኼ፡ አሁንም ጠያቂያችን እንዲህ ዓይነት ፍላጎት፣ ምኞት እያለዎት ገና ነዎት፣ የወጣትነት ዕድሜ ነው፣ ብዙ ነገር አካብደን ፣ ተስፋ ቆርጠን የምንርቅበት የሕይወት ደረጃ አይደለም ያለነው፡፡ እርስዎ ያሉት እንግዲህ 30 ዓመት ይሙላሽ የሚለው ገና የእዚህ ዕድሜ ባለቤት እንኳን እንዳልሆኑ ፣ የልጅነት የወጣትነት ዕድሜ ላይ የተፈተኑበት ነገር ምን እንደሆነ፣ በግል ሕይወትዎ ምክርም መክረን፣ እንደ ቤተክርስቲያን መምህር፤ እንደ ቤተክርስቲያን አባት የሚስተካከለው ነገር እንዲስተካክል ይደረጋል፡፡ እግዚአብሔርም ያግዘናል፣ ቸርነቱ ፣ ምሕረቱ ብዙ ስለሆነ፣ በተለመደው የውስጥ አድራሻችን ደውለው ያግኙንና ተጨማሪ ምክር እንሰጥዎታለን፡፡ በነገሩ ሁሉ የሚመክረን እግዚአብሔር የተመሰገነ ነው፡፡ ከእግዚአብሔር ቤት የሚለየን የሚያርቀን፡ ከክርስቶስ ፍቅር የሚለየን ምንድን ነው ሐዋርያው ቅዱስ ጳውሎስ፣ ለሮሜ ክርስቲያኖች በፃፈው መልእክቱ በሮሜ መልእክት ምዕራፍ 8 ያለው ማለት ነው፡፡ ከቁጥር 35 ጀምረን ስናነብ የምናገኘው ማለት ነው፡፡ ከክርስቶስ ፍቅር የሚለየኝ ማነው? በጣም ከባድ የተባሉ ብዙ ጦርነት ነው? ረሐብ ነው? ሠይፍ ነው? ደዌ ነው? ምንድን ነው? ብሎ ዘርዝሯቸዋል፣ ከክርስቶስ ፍቅር የሚለየኝ የለም ፡፡ ስለዚህ ብዙ የሥጋ ምክንያቶችን እየደረደርን ከቅዱስ ቁርባን ፍቅር የሚለየን ነገር አንዳችም የለም፡፡ይኼንን ነው ማየት ያለብን።

በአጠቃላይ ከእግዚአብሔር ቤት ልንርቅ አይገባንም፡፡ ልበ አምላክ ዳዊት ወደ እግዚአብሔር ቤት እንሒድ ባሉኝ ጊዜ በጣም ደስ አለኝ ነው ያለው፡፡ ይኼ የእስራኤል ገዢ ታዋቂው፣ ዝነኛው ንጉሥ ዳዊት፤ እንደ ሥጋዊ ሐሳብ ከሆነ በታላቁ ቤተ መንግሥት ነገሦ የሚኖረው ዳዊት፣ በሥጋው ብዙ የሚያስደስቱ ነገሮች እፁብ፣ ድንቅ የሚባሉ ነገሮች እንዳሉ የሚታወቅ ነው፡፡ ነገር ግን ዳዊት ምንድን ነው ያለው? ከምንም በላይ ሰው ሁሉ በሕይወቱ ደስ ከሚሰኝበት፣ ከሚደሰትበት ነገር፤ ወደ እግዚአብሔር ቤት መሄድ ነው፡፡ ከእግዚአብሔር ቤት አለመራቅ፣ አለመለየት፡፤ ይኸው ነው ሌላ ፀጋ የለም፡፡ እዚያ ቅዱስ መስቀል አለ፣ እዚያ ቅዱስ ጸበል አለ፣ እዚያ ቅዱስ ቁርባን አለ፣ እዚያ የእግዚአብሔር ቃል አለ፣እዚያ ቅዳሴ አለ፣ እዚያ ዝማሬ አለ፣ እዚያ በመንፈስ የመረጋጋት፣ የመጽናናት፣ ፍቅር አለ፣ ሠላም አለ ፣ትዕግሥት አለ ከእግዚአብሔር ቤት ሊለየን የሚችል አንዳችም ነገር የለ፡፡

ስለዚህ እንዳሉትም ለቅዱስ ቁርባን የሚሆንዎት ዝግጅት አድርገው፣ ልብሱ ሳይቀር፣ ተዘጋጅቶ ብለዋል፣ ይኼንን ምኞትዎትን፣ የልብዎትን ሐሳብ እግዚአብሐየር ይሞላዋል በእርግጠኝነት እኛ ደግሞ ሳይውሉ፣ ሳይድሩ፣ ቀጠሮ ሳይበዛ፣ ቶሎ ወደዚያ እንዲቀርቡ ተጨማሪ ምክር ስለምንሰጥዎት ቅድም እንዳልኩት በውስጥ መስመራችን ያግኙን፡፡

የመከረን፣ የገሰፀን የሠራዊት አምላክ ሥሙ ይመስገን፣ ፀጋ በረከቱን በሁላችን ላይ ያሳድርብን፡፡ ወስብሓት ለእግዚአብሔር አሜን

ቴሌግራም ግሩፓችንን በየቀኑ ይከታተሉ፣ ለወገኖትም ሼር ያድርጉ፦
https://t.me/+ReLdpifiso4Sz04q

👉ጥያቄ፦ ኀጢአት የሰራ ሰው ድንገት #ንስሐ ሳይገባ ቢሞት #ገነት ሊገባ ይችላል ወይስ አይችልም?

መልስ፦ አባላት ሁላችሁም በዚህ ጥያቄ ላይ የራሳችሁን ተሳትፎ እንድታደርጉ እድሉ ቢገጥማችሁ ምን ማለት እንደምትችሉ መገመት አያቅታችሁም። መቼም፤ የኀአተኛን ሞት አልወድም ይላል እግዚአብሔር በንስሐ ተመልሶ ዘለአለማዊ ህይወት ያገኝ ዘንድ እንጂ። ጠያቂያችን እርስዎም ቢሆን በአካል አግኝተነዎት መወያየት ብንችል ኖሮ መቼም ቅዱሳት መፃህፍት እንዳስተማሩን አባቶቻችን እንደነገሩን ከሆነ የሚኮነነው ኀጢአተኛው ሰው እንጂ ፃድቅ አይደለም። ይሄ ሁሉ በዚህ በስጋዊ አለም ውስጥ የአለሙ ነገር እያባዘናቸው ፈቃደ ስጋቸውን ለፈቃደ ነፍሳቸው እንዲያስገዙ ይሄንኑ ጎዶሎው የማይሞላው አለም ሲቃትቱና መከራ ስቃያቸውን ሲበሉ አንድ ቀንም እግዚአብሔር አብዝቶ ከሰጣቸው ጊዜ እና ኑሮ ለንስሐ እራሳቸውን ሳያዘጋጁ ከነኀጢአታቸው ተጠቅልለው ወደ ሰማያዊ የነፍስ ሞት የሚሄዱ በጣም ብዙዎች ናቸው ። እንግዲህ ሰው ኀጢአት የሚገለፅበት ብዙ የጥፋት መንገድ አለና፤ እየተነገረው! እየተማረ! እየተመከረ! እየተገሰፀ! እውነቱን እንዲያውቅ እየተደረገ! ወደ ንስሐ ህይወትም እንዲመለስ ቤተክርስቲያን እጅዋን ዘርግታ እየለመነችው! ኀጢአት ይሻለኛል ይሄ የጥፋቱ አለም ይሻለኛል ብሎ የእኔ ህይወቴ ይህ ነው፤ በዚህ በምድር ላይ ያልቃል ብሎ የወሰነው የልተኮነነ ሰው ማን ይኮነናል?

በእርግጥ ጥፋተኞችን በ 2 መንገድ ልንከፍላቸው እንችላለን። አንዳንዶቹ ጨርሰው የድንቁርና ጨለማ ውስጥ ገብተው ማንም ሳያስተምራቸው ሳይገስፃቸው ባላዋቂነት እንዲሁ እንደተጠቀለሉ ይመጡና እውነትና ሀሰትን፣ ጽድቅንና ኩነኔን፣ ጨለማና ብርሃንን፣ ህይወትና ሞትን ለይተው ሳይነገራቸው ሳያውቁት የሚኖሩ አሉ። አንዳንዶቹ ደግሞ አጣጥመው ሁሉን ነገር አውቀው ተረድተው የምድሩ ነገር ይሻለናል ብለው የምድሩን ነገር ይዘው ሃይማኖታቸውን ምግባራቸውን አቃለው አርክሰው በኀጢአት ህይወት ውስጥ እድሜ ዘመናቸውን የሚኖሩ አሉ። ከነዛኞቹ ጥፋት የነዚህኞቹ እጥፍ ድርብ ነው።

እግዚአብሔር መቼስ እውነተኛ ከፋይ ፍርድ የማያዳላ ለእያንዳንዱ እንደየስራው ወጋውን የሚሰጥ እውነተኛ ዳኛ ስለሆነ በሰራነው ኀጢአት መጠን በሰራነውም ፅድቅ መጠን ተመጣጣኝ ዋጋ ይከፍላል። ኀጢአተኞችም የሚፈረድባቸው በሰሩት መጠን ነው። እነሱ ባልሰሩት በሌላው ኀጢአት አይፈረድባቸውም። ሰው ነው በፍርደ ገምድልነት የወደደውን ኀጢአተኛም ቢሆን ያፀድቃል፣ የጠላውን ደግሞ ፃድቅ ቢሆንም ይኮንናል ፍርዱም እጥፍ ድርብ አድርጎ የሚፈርድባቸው አለ የሚያቀልላቸውም አለ። እግዚአብሔር ግን አይሳሳትም። የሰው ፊትም አይቶ አያዳላም። አንተ ትቀርበኛለህ፥አንተ ትርቀኛለህ ፣ አንተ ዘመዴ ነህ ፥ አንተ ባእዴ ነህ ፣ አንተ ባለውለታዬ ነህ አንተ ውለታ አልከፈልክም አይልም። እሱ በሰጠን እኛ በምንጸድቅበት እኛ በምንድንበት በዚህ በእውነተኛ ሃይማኖታችን ምግባራችን ፀንተን እንድንኖር ነው። እሱን  መውደዳችን እሱጋር መሆናችን ለእሱ ማድረጋችን እሚገለፅበት ከዚሁ እኛው እርስ በእርሳችን በመልካም ነገር አንዱን አንዱ እያከበረው እየወደደው እየተፈቃቀርን የምንሄድበት ጉዞ ሁሉ እኛው እራሳችን የዘራነውን ስለምናጭድ መልካም ብንዘራ መልካም የስንዴ ፍሬ ያለበትን እንሰበስባለን እናጭዳለን፤ ኀጢአት ብንሰራ ደግሞ ኀጢአት እናጭዳለን መለት ነው። ጽድቅም ብንሰራ ጽድቅን ነው ኩነኔም ብንሰራ ኩነኔን እናጭዳለን ማለት ነው።

ስለዚህ እየተነገረው፣ እየሰማ፣ እውነትና ሀሰቱን ጽድቅና ኩነኔ በረሃንና ጨለማው ለይቶ የኀጢአት መጨረሻውና ፍፃሜው ሞት እንደሆነ እያወቀ ከዚህኛው አለም የተለየ አለም እንዳለ እየተነገረው፤ ከዚህኛው ህይወት የተሻለ የሚበልጥ ዘለዓለማዊ ህይወት እንዳለ እይተነገረው፤ ከዚህኛው ከስጋዊ ኩነኔ ይልቅ በነፍስ ያለው ኩነኔ እጅግ የፀና መሆኑ እየተነገረው ይሄን ሁሉ ሳይሰማ ሳይለማ የያዝኩት ይሻለኛል ብሎ አሻፈረኝ ብሎ ክብረ ቤተከርስቲያንን ንቆ ደፍሮ የኖረ ሰው ያልተኮነነ ማን ሊኮነን ይችላል?! ሁላችንም ግን ስለ ወንድሞቻችን ስለ ወገኖቻችን መፀለይ ያለብን ማንም ሰው በነፍስ እንዳይጠፋ መፀለይ ነው። በአንዳችንም ላይ ለመፍረድ አቅሙ የለንም፤ ሁላችንም ኀጢአተኞች ነን። ምንስ ጽድቅና ኀጢአትን፣ እውነትና ሀሰትን ፣ ብርሃንና ጨለማን እንደው ከትምህርትም በፊት እኮ አዋቂ ፍጥረት አድርጎ ስለፈጠረን ብቻ በተሰጠን የተፈጥሮ ፀጋችን ማወቅ እንችላለን። ይሄን ሁሉ እንዲያውም በእኛ ላይ አሳድሮብን፣ ቀርፆብን ፣የሚረዳን አይምሮ ኖሮን ወደን ፈቅደን ለመኮነን ተስማምተን በግብረ ሰይጣን ትላንትና ለአንዴና ለመጨረሻ ጊዜ ጌታችን ድል ነስቶ ከእኛ የለየውን ሰይጣንን ዘመድ አድርገን አሁን እሱጋር መቀጠል ከፈለግን ኀጢአተኛ ሰው እንደሚፈረድበት ቅዱሳን መፅሐፍትም አስተምረውናል። በእርግጥ እኛ በእግዚአብሔር የጽድቅ ወንበር ላይ ተቀምጠን በፍርድ አደባባይ ተሰይመን አንዳችን በአንዱ ላይ የምንፈርድበት ምንም አይነት ሁኔታ የለም። እግዚአብሔር ያከበራቸው የመረጣቸው ቅዱሳኑ በዚህ በፍርድ አደባባይ በእያንዳንዱ ላይ ሊመሰክሩበት በእርግጥ ቅዱሳን ሐዋሪያት እናንተስ በኋለኛው ዘመን በፍርድ አዳባባይ ስመጣ በ12 ወንበር ላይ ትሰየማላችሁ ብሏቸዋል። እነዚህ የተለየ ክብር ያለቸው የተለየ ረቂቁንና የተሰወረውን ነገር አጥርተው ለማየት እግዚአብሔር ፀጋወን ያሳደረባቸው ቅዱሳን ናቸውና፤ ስለዚህ ወገኖች መቼ እንደምንጠራ አናውቅምና ከወዲሁ ሳይመሽብን ሳይረፍድብን ከጠፋንበት የጨለማ ጉዞ ውስጥ ወጥተን እጅግ እግዚአብሔርን ልናይ ወደሚያስችለን ብርሀን መጥተን በእውነተኛ መንገድ ተጉዘን ወደ ንስሐ ህይወት ተመልሰን የቤተክርስቲያንን ድምፅ ሰምተን ከኀጢአት ማሰሪያ ተፈተን እውነተኛውን መንግስት ለመውረስ እግዚአብሔር በቸርነቱ ይርዳን።

ተጨማሪ መንፈሳዊ ምክርና ትምህርት ድረገጻችን https://yohannesneseha.org ላይ ያገኛሉ

👉ጥያቄ፡- አባ እንዴት ነዎት? በመጀመሪያ ሰለቸኝ ደከመኝ ሳይሉ ምእመናን ለሚጠይቁት ጥያቄ በቂና ወደ ንስሐ የሚመልስ፣ ልባችን ተሰብሮ ወደ ንስሐ እንድንመለስ ስለረዱን እግዚአብሔር አምላክ ረጅም እድሜ ይስጥዎት እኔ ደካማ ኃጢአተኛ ስሆን፣ ኃጢአቴም ሁሌ እያነዘዘኝ እያቆሰለኝ መፈጠሬን ሁሉ አስጠልቶኝ ተስፋ የቆረጥኩ ሰው ነኝ፣ ግን አጋጣሚ ድረ-ገጻችሁን አግኝቼ ኃጢአቴን ሳስበው የምትሰጡትን ትምሕርት እንኳን መከታተል አልቻልኩም፣ ልፈነዳ ነው የምደርሰው ፈጣሪን እንዴት አድርጌ ብለምነው ነው ይቅር የሚለኝ? እኔ በጣም ከባድ ነው ብዘርዝረው አያልቅም፣ አባ ፈቃደኛ ከሆኑ እርስዎን በአካል ነው ማግኘት ነው የምፈልገው፡-

✍መልስ፡- ጠያቂያችን እግዚአብሔር ወዶና ፈቅዶ እንኳንስ ወደዚህ መንፈሳዊ ፕሮግራማችን በሰላም መጡ ነው የምንለው፣ ወደ እዚህ የመምጣትዎ ነገር ወደ እግዚአብሔር የመቅረብዎት አጋጣሚ ነው ሁላችንም ያየነው፣ እግዚአብሔር ደግሞ ወደ እሱ የመጣውን ሰው ዝም አይለውም፡፡

በዚህ ጭንቀት ውስጥ፣ በዚህ ኃጢአት ውስጥ፣ በዚህ ፈተና ውስጥ፣ በዚህ መከራ ውስጥ እንደወደቀ አይተውም፣ ቸርና መሐሪ አምላክ ነው፣ ሁሌም ከአንደበታችን መለየት የሌለበት ኃይለ ቃል “ያልጠፋነው ከእግዚአብሔር ምህረት የተነሣ ነው” ቤተክርስቲያናችን የንሰሐ ግምጃ ቤት ናት፣ ንስሐ ለሚገቡ የኃጢአት ስርየት ለማግኘት የተዘጋጀ ማንም የማይከለክለው፣ ማንም የማይወስድብን በጎ እድል አለን፡፡

በንስሐ ሕይወት ወደ እግዚአብሔር እንመለስ ዘንድ የእግዚአብሔር የምሕረት እጆቹ፣ የይቅርታ እጆቹ የተዘረጉ ናቸው ይቅር ይለን ዘንድ አኛም የመማፀኛችን ከተማ አድርጎ በዚህ ዓለም ላይ ስለ እኛ የተከላትና፣ ስለእኛ በደሙ የዋጃት ቅድስት ቤተክርስቲያንም በሮቿ የተከፈቱ ናቸው፣ የተዘጉ በሮች የሏትም ፡፡

እግዚአብሔር የተዘጋ በር የለውም ሁላችንም እስከ ጢያታችን፣ እስከበደላችን፣ እስከጉዳችን፣ እስከኮተታችን ፣ እስከሰቀቀናችን፣ እስከ ኃፍረታችን ምሕረትና ቸርነት ወደሚያበዛልን አምላካችን ቤት እንመጣ ዘንድ የእግዚአብሔር በር ክፍት ነው፣ የእግዚአብሔር የምሕረት እጅ፣ የይቅርታ እጅ የተዘረጉ ናቸው፡፡

ከዚህ አንፃር ነው አኛም ብንሆን እስከነ ኃጢያታችን፣ እስከነ በደላችን በፍፁም ልጅነት፣ በፍፁም እምነት፣ በድፍረት ግድላችሁም ኑ ተያይዘን ከምንጠፋ፣ ተያይዘን እንልማ፣ ተያይዘን ኃጢያተኛ ከምንሆን ይልቅ ተያይዘን ፃድቅ እንሁን፣ እንፅደቅ እያልን ጥሪ የምናደርገው ከሌላው የተሻለ ሕይወት ያለን፣ እግዚአብሔር ቸርና መሐሪ መሆኑን ቀምሰን አጣጥመን ስለምናውቅ ብቻ ነው፡፡

እግዚአብሔር ልጁ በጠፋበት በአንድ ሐብታም ራሱን መስሎ የጠፋውን ልጄን አግኝቼዋለሁ ደስ ይበላችሁ፣ ደስ ብሎኛል ነው ያለው፣ የልጁን መገኘት ለደስታው ወደር አጠቶለት የተለየ ዝግጅት አድርጎ ከዚህ የሚበልጥ ሌላ የደስታ ጊዜ የለኝም የሚያስደስተኝም አንዳች ነገር የለም፣በልጄ መገኘት ደስታዬ ወደር የሌለው ስለሆነ ለዚህ ደስታዬ ይሆን ዘንድ እነሆ ወደ ግብዣዬ እንድትመጡ ነው ያለው፡፡

ፍሪዳው ታርዷል፣ ተወራርዷል፣ ጠጁ ተጥሏል፣ ዳሱም ተሠርቷል፣ ሁሉ ነገር በተገቢው መንገድ ፧ተዘጋጅቷል፣ ተሟልቷል ኑ ከእኔ ጋር ተደሰቱ ከእኔ ጋር ደስ ብሎኛል ነው ያለው፣ በንስሐ ተፈልጎ የተገኘ ሰው በእኛና በራሱ በባለቤቱ ዘንድ ብቻ ሳይሆን ደስታው በሰማይ መላእክትና በእግዚአብሔር ዘንድም ደስታ ይደረገናል ይለናል መጽሐፉ፡፡

ከዚህ የተነሳ ጠያቂያችን በእርግጥም ነው ኃጢያት ያላሳፈረው፣ ኃጢያት ያላስለቀሰው፣ ኃጢያት ያላሳዘነው ሰው ሌላ በምን ሊያዝን ይችላል? እውነትም እንዳሉት ነው እግዚአብሔር ቀድሶ በፈጠራት ምድር እንዲህ በረከሰ ሕይወት ስንኖር እስከነ ጉዳችን ወደን ፈቅደን የገባንበትን ኃጢያታችንን ተሸክመን እስከ መቼ ድረስ ነው እንዲህ ብለን ደንዝዘንስ የምንቀጥለው? እውነትም ነው ያጨናንቃል፣ ግን ከአሁን በኋላ በእርስዎ ሕይወት ላይ ጭንቀት አይሠራም፣ ሐፍረት አይሠራም፡፡

ጠያቂያችን እስካሁን የመጡበት የኃጢያት ጉዞ፣ የፈተና ጉዞም ሊቀጥሉ አያስፈልግም ወደ ንስሐ ሕይወት ይምጡና ትክክለኛውን መንገድ እግዚአብሔር ወደ እውነተኛዋ፣ ለልጆቹ ያወርሳት ዘንድ ወደ አዘጋጃት መንግሥቱ ሁላችንም እንዲያሰባስበን አሁኑኑ ፈጥኖ ወደ ንስሐ ሕይወት መምጣት ያስፈልጋል ” የመዳን ቀን ዛሬ ነው፣ ያውም አሁን ነው” ተብለናል የኃጢያት ቀጠሮ አያስፈልግም፡፡

ስለዚህ እርስዎም በትክክለኛ የእኛን ድረ-ገጽ አግኝተው፣ በእሱ ደግሞ ከእርስዎ ጉዳይ ጋር፣ ከእርስዎ ሐሳብ ጋር፣ ከእርስዎ ጭንቀት ጋር አብሮ ሊሔድ፣ ሊመክር፣ ሊገስፅ፣ ሊያስተምር የሚችል መልእክታችንን አግኝተው፣ ከልብ ተመልሰው ከሆነ ሌላ ተጨማሪ ጊዜ ሳያጠፉ በቶሎ ያግኙን፡፡

እንዳሉትም በአካል አግኝተውን፣ እኛም እግዚአብሔር በእውነትም የዘራነውን ለፍሬ አብቅቶታል፣ በእኛ በደካሞቹ ጥረትና ትጋት የተዘራው ዘራችን ሠለሳ፣ ስልሳ፣ መቶ አፍርቷል የምንለው በእንዲህ ዓይነት ሕይወት ውስጥ ያሉትን ሰዎች ለንስሐ ሕይወት አብቅተን ማየት፣ ለቅዱስ ቁርባን አብቅተን ማየት፣ ወደ መንፈሳዊ ሕይወታቸው፣ ወደ ቀደመ ክብራቸው ተመልሰው ማየት ከዚህ በላይ እኛንም እግዚአብሔርንም የሚያስደስት ነገር የለም፡፡

እግዚአብሔር ይመስገን ደግሞም እግዚአብሔር ያደርገዋል በዚችው ከሁሉ ባነሰቸው አገልግሎታችን እና ይህንን አገልግሎት ከጀመርንበት ጊዜ ጀምሮ ብዙ ወገኖቻችን ከገቢረ ኃጢያት፣ ወደ ገቢረ ፅድቅ፣ ከሞት ወደ ሕይወት፣ ከጨለማ ወደ ብርሐን፣ ካለማመን ወደ ማመን በጣም ብዙ መጥተዋል እግዚአብሔር ይመስገን፣
ከዚህ የተነሣ በአካልም ተገናኝተን እንዳሉትም ጊዜም አጥፍተን፣ ደክመንም ቢሆን እርስዎን ማትረፍ እንደምንችል እናምናለን፣ ባለን አድራሻ ደውለው ያግኙን፡፡

የመከረን የገሰፀን የቅዱሳን አምላክ እግዚአብሔር ስሙ ይመስገን አሜን

ቴሌግራም ግሩፓችንን በየቀኑ ይከታተሉ፣ ለወገንዎትም ሼር ያድርጉ፡-
https://t.me/+ReLdpifiso4Sz04q

👉ጥያቄ፡- ሰላም አባታችን እንዴት ነዎት? የእርስዎን ግሩፕ በቅርቡ ነው የተቀላቀልኩት የምትሰጡት ትምህርት በጣም ደስ ይላል፣ አባታችን ቃለ ሕይወትን ያሰማልን፣ አይምሮዬን ሰላም የሚያሳጣኝ ችግር አለብኝ፣ ምን እንደማደርግ አላውቅም፣ የዲያቢሎስ መጫወቻ እንዳልሆን እፈራለሁ፣ ንስሐ መግባት ፈልጌ ነበር፡-

👉🏾 ስለ #ፍርሃት መንፈስ እና #ንስሐ

✍️መልስ፡- ጠያቂያችን ግልጽ ያላደረጉት ነገር እንዳለ ይታያል፣ ከአእምሮዎት ጋር ያለ ችግር ምንድን ነው? የሚለውን ግልፅ ቢያደርጉት እዚህ ግሩፕ፣ በቅርብ እንደተቀላቀሉ ነው የነገሩን፣ ይበርቱ አይዞዎት፣ ተስፋ መቁረጥ የለብዎትም፣ እኛ ሁላችንም የምንችለውን ሁሉ ለማገዝ ከጎንዎት ነን፡፡

ሰላም የሚያሳጣ ችግር ምንድን ነው? የሚለውን ግልፅ ቢሆን ጥሩ ነው፣ ይሔ ችግር ያሉትን ነገር በውስጥ መስመር ያግኙንና ብንነጋገር ጥሩ ነው፣ አይምሮ ማጣት የሚለው ለምሳሌ የእንቅልፍ ማጣት፣ ራስ ጋር መጣላት ዓይነት ሌሎች ሰዎች ጋር መጨቃጨቅ፣ መረበሽ ሁሌ በሄዱበትም በሚመጡበትም ሰላምን ማጣት እንዲህ ዓይነት ብዙዎች ኃጢአተኛ ከሆነ ሰው ይገለጣሉ፣ ይከሰታሉ፡፡

ዲያቢሎስ እኛን የሚጫወትብን የእኛ ትንሽ ነፃ ፈቃድ ስላለችን ነው፣ የመዳንም ያለመዳንም፣ እሺ ማለትም፣ እምቢ የማለትም፣ የእኛን ፈቃድ ተጠቅሞ ነው፣ እኛ ኃጢአትን እምቢ ማለት ነው ያለብን፣ ዲያቢሎስ ሰውን አስገድዶ መጥፎ ደርጊት የሚያሠራ፣ ቢሆን ኖሮ ጻድቅ ደግ አባት የምንለው ሰው አይገኝም ነበር፡፡

እኛ ደካሞች ሆነን ነው፣ ለዲያቢሎስ መጫወቻ የሚያደርገን ክፉ ሥራ መሥራታችን፣ ኃጢአት፣ መሥራታችን፣ መዋሸታችን፣ መዘሞት፣ በአፅዋማት መብላት፣ በጠቅላላው ትእዛዘ እግዚአብሔርን አናደርግም ስንል ያ ትእዛዘ እግዚአብሔር ለእኛ ጠቃሚ ስለነበር ላንታዘዝ ስንል የዲያቢሎስ መጫወቻ እንሆናለን ማለት ነው፡፡
ትእዛዘ አግዚአብሔርን የምንፈፅም ከሆነ፣ ለእግዚአብሔር የምናታዘዝ፣ እሺ የምንል ከሆነ፣ እርኩስ መንፈስ እኛ ጋ ቦታ አይኖረውም፣ ሐዋርያው ያዕቆብ በመልእክቱ ምዕራፍ 4 ቁጥር 7 ላይ “እግዚአብሔርን እሺ በሉት ሰይጣንን ግን እምቢ በሉት፣ ከእናንተም ይርቃል፣ እግዚአብሔርን ቅረቡት እርሱም ይቀርባችኋል” ብሎ ተናግሯል፡፡

ስለዚህ እምቢ ማለት ይቻላል፣ ሰይጣንን እምቢ ያሉ በርካታዎች ስለሆኑ፣ እርስዎም ያንን ኃጢአትን ጠልተው ሰላም የሚያሳጣ መሆኑን አውቀው፣ ከእግዚአብሔር የሚለይ ረድኤት የሚያሳጣ፣ መሆኑን አውቀው፣ የኃጢአትን ችግር ተረድተው፣ ከዚያም የበለጠ ወደ ሲዖል እንደሚያስገባ አውቀው ተረድተው ንስሐ መግባት ነው፡፡

መፍራት ያለብን ክፉ ሥራ ስንሠራ ነው፣ መፍራት ያለብን ኃጢአትን ስንሠራ ነው እንጂ ለመዳን፣ ንስሐ ለመግባት ግን መፍራት የለብንም፣ ስለ ንስሐ በአጭሩ ለማስቀመጥ ያህል፤ ንስሐ ማለት ከእግዚአብሔር ጋር እንደገና መኖር ነው፣ ኃጢአት የሚባለው ከእግዚአብሔር ለይቶን ነበር፣ እግዚአብሔርን አሳጥቶን ነበር፣ ንስሐ ስንገባ ግን ከእግዚአብሔር ጋር ልንኖር ነው ማለት ነው፡፡

“ንስሐ ዘማን እንደ ድንግል፣ ኃጠአተኛውንም እንደ ፃድቅ ታደርገዋለች” ተብሎ ተጽፏል፣ ዘማውን እንደ ድንግል ስንል የሥጋ ድንግልና ይገኛል ማለት አይደለም፣ በነፍስ ድንግል ይሆንልናል ማለት ነው፣ የበደልነው በደል አይቆጠርብንም ይቅር ይልልናል፣ አይያዝብንም ለማለት ነው፡፡

ስለዚህ ንስሐ ማለት መጥፎ ድርጊትን መተው ነው፣ ከመጥፎ ድርጊት ለመውጣት ደግሞ ከራስ ጋር ተመካክሮ፣ ያንን መጥፎ ድርጊት ጠልቶ፣ ትቶ ያ መጥፎ ድርጊት በኃጢአት ሲያኖረን የነበረው ከዲያቢሎስ ጋር ስለነበረ ዲያቢሎስን እምቢ ብሎ ወደ እግዚአብሔር መምጣት፣ ለእግዚአብሔር እሺ ማለት ነው፣ ከእንግዲህ በኋላ ተሳስቻለሁ የማይገባ ሥራ አድርጌያለሁ፣ ከእንግዲህ በኋላ ከእግዚአብሔር ጋር ለመኖር ፈቃደኛ ነኝ ብሎ ከእግዚአብሔር ጋር መኖር ነው ማለት ነው፡፡

ስለዚህ ጠያቂያችን እንደጠየቁትም ንስሐ መግባት ይችላሉ፣ ቅዱስ ጳውሎስ የሐዋርያት ሥራ ምዕራፍ 2 ቁጥር 37 ላይ በሚያስተምርበት ጊዜ ጌታችን መድኃታችን ኢየሱስ ክርስቶስን እንዴት ከሙታን ተለይቶ እንደተነሣ፣ ሐብተ መንፈስ ቅዱስ እንዴት እንደላከላቸው ሲያስተምራቸው፣ ሲነግራቸው ልባቸው ተነካ፣ ምን እናድርግ አሉት ንስሐ ግቡና ሐብተ መንፈስ ቅዱስን ታገኛላችሁ፣ በኢየሱስ ክርስቶስ ስም አምናችሁ ተጠመቁ፣ ንስሐ ግቡ፣ ሐብተ መንፈስ ቅዱስን ታገኛላችሁ አላቸው ይላል፡፡

ስለዚህ እርስዎ ያጡትን ለማግኘት ንስሐ መግባት ነው፣ ምንም አማራጭ የለውም በኃጢአት የወደቀ ሰው የሚነሳው በንስሐ ምርኩዝ ነው፡፡ ስለዚህ በኃጢአት የወደቅን በንስሐ ተነስተን፣ ቅዱስ ሥጋውን ክቡር ደሙን ተቀብለን የማታልፈውን ርስት መንግሥተ ሰማያትን እንድንወርስ ቸሩ መድኃኔዓለም ይርዳን አሜን ፡፡

የመከረን የገሰፀን የአባቶቻችን አምላክ ልዑለ ባሕርይ እግዚአብሔር ዛሬም ዘወትርም ስሙ የተመሰገነ ይሁን፣ አሜን

ቴሌግራም ግሩፓችንን በየቀኑ ይከታተሉ፣ ለወገንዎትም ሼር ያድርጉ፡- https://t.me/+ReLdpifiso4Sz04q

👉ጥያቄ፡- ሰላም አባቴ #ንስሐ መግባት በጣም እፈልጋለሁ፣ አሁን ደግሞ መግባት አይቻልም ተባለ፣ በቆየሁ ቁጥር ደግሞ #ኃጢአት እየበዛ ነው፣ ንስሐ እገባለሁ እያልኩ 3 ዓመት ሞላኝ አባ ጋ ስደርስ #ፍርሃት ይይዘኝና እመለሳለሁ፣ ምን ላድርግ አባቴ ጨነቀን እኮ?

✍መልስ፡- የእግዚአብሔር ወዳጆች እስኪ እናስተውል የሚጨንቀን ንስሐ ባይኖር ነበር፣ የሚጨቀን ንስሐ ገብቶ ባይዳን ነበር፣ ንስሐ ግቡና ተመለሱ እኔ ይቅር እላችኋለሁ እየተባልን ጨነቀን ማለትስ እንዴት ነው?

ንስሐ የሌለው ሰይጣን ይጭነቀው መመለስ የማይችለው ሰይጣን ይጭነቀው፣ እኛ እግዚአብሔር ተመለሱ እኔም እመለሳለሁ ነው ያለን፣ ይሔን ያህል ማለትም ሦስት ዓመት ሙሉ ንስሐ እገባለሁ እያሉ መኖርም ትክክል አይደለም፣ ሲጀመርም ንስሐ ለነገ አይባልም፡፡

ንስሐ ቀጠሮ አያስፈልገውም ክርስቲያኖች እባካችሁ ሕሊናችሁን ክፍት አድርጉ፣ የእግዚአብሔር ቃል በሕሊናችሁ ይፃፍና፣ አላስፈላጊው ክፉ ነገር ጠፍቶ መልካም ነገር በሕሊናችሁ ተፅፎ ሥራ እንድትሠሩ ፈቃደኖች ሁኑ፣ እግዚአብሔር በራዕይ ዮሐንስ እንዲህ ይላል “እያንዳንዱን አንኳኳለሁ፣ በየበሩ አንኳኳለሁ የሚከፍትልኝ ካገኘሁ ከእሱ ጋር እራት እበላለሁ “ይላል፡፡

እግዚብሔር በእኛ ልቦና እንዲያድር ፈቃደኞች እንሁን፣ ጠያቂዎች ብቻ መሆን የለብንም፣ ለመዳን ፈቃደኖች እንሁን፣ ንስሐ ቀጠሮ አይሰጠውም፣ እግዚአብሔር ቸር ነው ሰው የሚሞተው አንዲት ደቂቃ ባልሞላበት ውስጥ ነው፣ ኃጢያትን ተሸክሞ ሁል ጊዜ መኖር እጅግ ከባድ ነው፡፡

እስከዚህ ሰዓት ያደረሰን እግዚአብሔር የተመሰገነ ይሁን እና ንስሐ ቀጠሮ የለውም፣ የማቴዎስ ወንጌል ምዕራፍ 6 ቁጥር 33 ላይ ኃጢአታችሁን ለነገ እንናዘዛለን አትበሉ፣ አታውሉ አታሳድሩ የእለቱን ተናዘዙ፣ የነገውን ደግሞ ነገ ንስሐ ትገባላችሁ ተብሎ የተፃፈው፣ ምክንያቱም ነገ የእኛ አይደለም፣ ነገ ምን እንደሚሆን አናውቅም፣ ከዚህ አንፃር ንስሐ ቀጠሮ የለውም ኃጢአታችንን ተናዘዝን ወዲያው ንስሐ መግባት ነው ያለብን፡፡

በዚህ በበዓለ ሃምሳ ንስሐ የለውም ለተባለው፣ የንስሐው ዓይነት ይለያያል፣ ሃምሳ ቀን ሙሉ ሰው ንስሐ ሳይገባ ቀረ ማለት ምን ማለት ነው? ለምሳሌ በዚህ ሰዓት ጾም የለም፣ ስግደት የለም፣ ይሔ ዓይነት ቀኖና አይሰጥም እንጂ፤ መስዋእት፣ ጸሎት መስጠት ተገቢ ነው፣ እንጂ ይሔን ያህል ቀን ሃምሳ ቀን ሙሉ በኃጢአት ውስጥ ኃጢአትን ተሸክመን ኖርን ማለት ዛሬን ብንሞትስ? ኃጢያት ታስሮ ወደ ሲዖል መጣል ነው እድላችን ማለት ነው፡፡

የንስሐው ዓይነት ቀኖናው አሰጣጡ ይለያያል፣ ልክ እንደሌላው ቀን ስግደት፣ ጾም ላይኖር ይችላል፣ ነገር ግን በጸሎትና በምፅዋት አማካኝነት ንስሐው እንዲከናወን ይደረጋል፡፡

ጠያቂያችንም ንስሐ መግባት በጣም እፈልጋለሁ ነው የሚሉት፣ ነገ ዛሬ አንበል፣ በእርግጥም እየዋልን ባደርን ቁጥር፣ በቆየን ቁጥር፣ በኃጢአት ላይ ኃጢአት እየጨመርን ነው የምንሔደውና ያን ሁሉ ሳንናገረው፣ ሳንናዘዘው ታስረን፣ ተተብትበን እንዳንሔድ ኃጢአታችንን ማዋል ማሳደር የለብንም፣ ምክንያት መፍጠር የለብንም፣ ራሳችን በኃጢአት የወደቅን ሰዎች ራሳችንን በንስሐ አንፅተን ሥጋወ ደሙን ተቀብለን እንድንኖር ቸሩ መድኃኒዓለም ይርዳን፡፡

የመከረን የገሰፀን የቅዱሳን አምላክ እግዚአብሔር ስሙ ይመስገን አሜን

ቴሌግራም ግሩፓችንን በየቀኑ ይከታተሉ፣ ለወገንዎትም ሼር ያድርጉ፡-
https://t.me/+ReLdpifiso4Sz04q

👉ጥያቄ፡- ንስሐ መግባት እፈልጋለሁ፤ ኃጥያቴ እጅጉን በዛ፣ ንስሐ ለመግባት ምን ማድረግ ነው ያለብኝ? ሁሉን ትቼ ወደ ፈጣሪዬ መመለስ እፈልጋለሁ፣ እባክዎትን አባቴ መላውን ንገሩኝ፡-

✍ መልስ፦ በጣም መልካም ነገር ነው፤ ዛሬውኑ በተለያየ ጥያቄ ላይ ተመስርተን የሰጠነው የጥያቄ መልስ፣ ምክር፣ ትምሕርት አብዛኛው ማለት ነው ንስሐ ከመግባት ጋር የተያያዘ ነው፡፡
ንስሐ መግባት ለእኛ አስፈላጊ እንደሆነ፣ ወደ ንስሐ እንድንቀርብ ምክንያት የሚሆኑን አባት፣ መካሪ የሚሆኑን አባቶች የሚያስፈልጉን መሆኑን ነው እየተነጋገርን ያለነው፡፡

ጠያቂያችን ኃጢያት ሰልችቶኛል፣ ኃጢያት ዘግንኖኛል፣ ኃጢያት ስልችት ብሎኛል፣ ስለዚህ ወደ በጎ ነገር ልመለስ የኃጢያት ስርየት ላገኝ እንደሚገባኝ ሁሉ ወስኛለሁ ብሎ በራሱ መጠየቁ እጅግ የሚደነቅ ሰው መሆኑን ይነግረናል፡፡
“ፃድቅ ሰባት ጊዜ ቢወድቅም ሰባት ጊዜ ይነሳል” ተብሎ ተጽፏል፣ በኃጢያት መሰናል፣ አደናቅፎን መውደቅ የግድ ከሆነ እግዚአብሔር ደግሞ ተስፋ ቆርጠን፣ ወድቀን፣ ተሰብረን፣ ተዘርረን፣ እንዳንቀር ደግሞ ትነሳላቸሁ ብሎናል፡፡

ሊያስነሳን፣ ሊያግዘን፣ ሊረዳን፣ ሊደግፈን፣ አፅንቶ፣ አበርትቶ ሊያቆመን የወደደና ያታመነ አምላክ አለን፣ ክብርና ምስጋና ለእሱ ይሁን፤ ሰው ሁሉ ሰው ሆኖ የማይበድል፣ እንጨት ሆኖ የማይጨስ የለምና፡፡ሐዋርያው ዮሐንስም በመልአክቱ በአንደኛ ዮሐንስ ምዕራፍ 1 ቁጥር 8 ላይ ኃጢያት የለብንም ብንል፤ እራሳችንን እናስታለን፣ እውነትም በእኛ ውስጥ የለም ይላል፡፡
እንዲህ ብሎ መናገር ነው ሁል ጊዜም የምንላችሁ፣ እንዳውም እኛ ምንም አንሳሳትመም፣ ኃጢያት አንሰራም፤ በደል አንሰራም፣ ክፋት አንሰራም፣ በደል አንሰራም ብንል በፍፁም ስሕተት ነበር የሚሆነው፡፡
ከዚህ ሁሉ የተጠበቁ፣ ከዚህ ሁሉ የራቁ፣ የተጠበቁ ልዩ ጸጋ ያላቸው፣ ልዩ ፅናትና ብርታት ያላቸው አባቶቻችን ካልሆኑ በስተቀር ሁላችንም በየቦታችን ስለምናውቀው፣ በየቤታችን፣ በምናውቃችው ሰዎች ሁሉ ኃጢያትን ስለምናውቀው፤ እኛም ደግሞ በተወሰነ ደረጃ እንደየጥፋት መንገዳችን ኃጢያትን ስለምናውቀው እንዴት ብለን ነው ኃጢያት የለብንም የምንለው፡፡
ቅዱስ ዮሐንስ ኃጢያት የለብንም ብንል ራሳችንን እናስታለን ነው ያለው፤ እውነትም በእኛ ውስጥ ዓለም የለም ማለት ነው፤ ከዚህ በላይ ምን አለ? የእግዚአብሔር ቃል ነው ይሔ፤ ስለዚህ ክርስቲያን ፈርዶብን በኃጢያት ብንወድቅም እግዚአብሔር ይመስገን፣ ፈጥነን በንስሐ እንነሳለን፡፡

አንድ ጊዜ ወድቄያለሁ ብሎ በኃጢያት ላይ ኃጢያት፣ በበደል ላይ በደል እየጨመሩ በዚያው እስከ በደላችን እንዲሁ እድል ፈንታችን ሞት ሆኖ፣ ጥፋት ሆኖ፣ ኩነኔ ሆኖ፣ ጨለማ ሆኖ መኖር የለም፣ በቀቢፀ ተስፋ እንዳንኖር የሁሉ ነገር ምሳሌና መሪ የሆነን እግዚአብሔር ነው፡፡
በትንቢተ ሕዝቅኤል ምዕራፍ 18 ቁጥር 21-23 የተጻፈውን ስናይ ኃጢያተኛውም ካደረገው ኃጢያት ሁሉ ቢመለስ፣ ትእዛዜንም ሁሉ ቢጠብቅ፣ ፍርድና ቅን ነገርን ቢያደርግ ፈፅሞ በሕይወት ይኖራል እንጂ አይሞትም ይላል፡፡
ስለዚህ ጠያቂያችን በጣም መልካም ነገር አስበዋል፣ እግዚአብሔር ይመስገን፣ ለዚህ አገልግሎት ዘወትር የሚተጉ አባቶች አሉ፣ የንስሐ ሕይወትን በየደረጃው፣ የእኔ ንስሐ፣ የእኔ ኃጢያት፣ የእኔ በደል ይህ ነው ብለው ለመናገር አስቀድመው የሕሊና ዝግጅትና፣ ከልብ መፀፀት የሐጥያት ስርየት እንደሚያገኙ ማመን ነው፡፡
በእኛ ላይ ተራራ የሚያክለውን የእዳ በደላችን ሁሉ ጠራርጎ፣ ደምስሶ፣ ከሕይወታችን አጥቦ የሚያጠፋልን የሁሉ ነገር የባሕርይ ሥልጣን ያለው እግዚአብሔር ነው፡፡

ለመዳን፣ ለመናዘዝ ምክንያት አድርጎ ያስቀመጣቸው፣ የሾማቸው መልእክተኞቹ፣ አገልጋዮቹ አድርጎ ያቆማቸው፣ የላካቸው አባቶች አሉን፣ እግዚአብሔር ይመስገን፡፡

ሐሰተኞች ሺህ ነገር ቢያወሩ አንስማ፣ መጽሐፍ ቅዱስ ብንጠቅስ፣ ብንጠቅስ፣ ሐሰተኞች የሐሰት ነገር አያጡም፣ የሚያወሩት ወሬ አያጡም፣ ሰውን ለማሳት ሰይጣን ነው በቅርቡ በአንደበታቸው ላይ የሚያቀብላቸው፡፡

እንዲህ ዓይነት ሕይወት እንዲኖረን ያገዘን እግዚአብሔር፤ እኔስ ኃጥያቴ፣ በደሌ በጣም ብዙ ነው ብሎ ማለት፣ አይደለም ለኋለኛው ዓለም፣ ለዘላዓለማዊው ዓለም፣ ለሠማያዊው ዓለም ይቅርና፤ በዚህ ምድር ላይ እረፍት ነስቶን የሚኖር በጣም ብዙ ጉድ ያለብን ነው፡፡ ላልጠቀመን፣ ውጤታማ ላልሆንንበት ነገር ስንስገበገብ የገባንበት ነገር መውጫ አቅቶን፣ በጣም ብዙ ጉድ ተሸክመን ነው ያለነው እግዚአብሐር በቸርነቱ እንጂ፣ አንድ ቀን የእዳ ደብዳቤያችንን ቢገልጠው እኮ ለመስማትም ለማንበብም የሚሰለች ጉድ ያለብን ሰዎች ነን፡፡

የአግዚአብሔር ቸርነቱና ምሕረቱ ግን በዝቶልን፣ የእኛ ኃጢያትና በደል፣ የኃጢያት ክምራችን ሁሉ በእሱ ቸርነትና ምሕረት ተከድኖልን፣ የንስሐ ሕይወታችንም ከኃጢታችን በላይ ዋጋ ኖሮት ይሔን ሁሉ በደልና ኃጢያት እግዚአብሔር ይቅር ይለናል፡፡

ከዚህ የተነሳ ወደ ፈጣሪ መመለስ እፈልጋለሁ፣ ንስሐ ለመግባት ምን ማድረግ አለብኝ? ብለዋል፣ ምናልባት ከእርስዎ የሆነ ነገር ለመረዳት የመጨረሻ ደረጃ እንዲያደርጉ ለመምከር ባለን የስልክ አድራሻ አናግሩን፡፡

ስርዓቱማ የታወቀ ነው፣ የንስሐ አባት አለዎት ማለት ነው፣ የእኛ የንስሐ አባቶቻችን ወይም፣ የነፍስ አባቶቻችን ከእግዚአብሔር ቀጥሎ የምናምናቸው ሴትም ለባሏ ፣ወንድም ለሚስቱ የማይነገረውን፣ ለእናትም፣ ለአባትም የማይነገረውን፣ ለምንወደው ሚስጥረኛ ጓደኛ የማንነግረውን፣ ከምንም በላይ ሊቀርቡን ልጆቻችን፣ እህቶቻችን የማንናገረውን ከእነሱ የተደበቀውን፣ የተሰወረውን በዚህ ምድር ላይ ከእግዚአብሔር ቀጥሎ የምንነግረው ለካሕን ብቻ ነው፡፡

እኛን በዚህ ምድር ላይ እንደ ተራራ ያክል አጉብጦ የከበደንን የኃጢያት ሸክም አውረደን እናሳርፈዋለን፣ ካሕኑ ደግሞ ስለ እኛ ይታመናል፣ በተሰጠው አደራ መሠረት ደግሞ የኃጢያት ስርየት የምናገኝበትን ቀኖና ይሰጠናል፡፡
የሚሰጠን ቀኖና መጾም ይሁን፣ መጸለይ ይሁን፣ መስገድ ይሁን፣ ምፅዋት ማድረግ ይሁን፣ በዚህ መሠረት የንስሐ አባት የሌለው ሰው እንዴት መያዝ እንዳለበት እንነግራለን፣ የንስሓ አባት ከተያዘ ደግሞ ከልብ ተፀፅቶ፣ ወደ ንስሐ አባት ቀርቦ የተሰጠንን ቀኖና በስርዓት ማከናወን አለበት፡፡
አባቶችም በስርዓቱ ዋጋ እንድናገኝበት፣ የኃጢያት ስርየት እንድናገኝበት የሚያስችለውን ቀኖና እንዲሰጡን ያስፈልጋል፤ በእውነተኛ እምነት ማለት ነው፣ ከዚህ አንፃር ነው እግዚአብሔር ቸርና መሐሪ አምላክ ስለሆነ ሁሉን እያደረገልን ነው፡፡
በዚህ ጾም ጊዜ ብዙዎች ወደ ንስሐ ሕይወት እንደቀረቡ፣ ከምንም በላይ ራሳቸውን ለእግዚአብሔር እንዳስረከቡ፣ ኃጢያታቸውን እንዳስመረመሩ ሁሉ ተስፋ ያደረግንበት ነገር ብዙ ነው፡፡

ከዚህ ቀደምም ስለ ንስሐ ሕይወት የሰጠነው ምክርና ትምሐርት በድረ ገጻችን ገብተው እንዲከታተሉ በአከብሮት እንነግራለን፡፡👇

https://t.me/c/1172495782/34692
https://t.me/c/1172495782/22081
https://t.me/c/1172495782/37500
https://t.me/c/1172495782/30259

የመከረን የገሰፀን የቅዱሳን አምላክ እግዚአብሔር ስሙ ይመስገን አሜን

ቴሌግራም ግሩፓችንን በየቀኑ ይከታተሉ፣ ለወገንዎትም ሼር ያድርጉ፡-
https://t.me/+ReLdpifiso4Sz04q

👉ጥያቄ፦ ንስሐ መግባት ሁል ጊዜ እመኛለሁ ግን ሳስብ የሆነ መሰናክል አያጣኝም ምን ላድርርግ ግራ ገባኝ?

መልስ፦ እንግዲህ ጥያቄው እንደተመለከታችሁት ንስሐ መግባት ፈልጌ ለንስሐ ህይወት እዘጋጃለሁ፤ የንስሐ ቀኖና ተቀብዬ እንዳልፈፅም ግን ምክንያቶችና መሰናክል ይበዙብኛል ነው የሚለው ። መቼስ የመዳን ቀን አሁን ነው የሚለውና ጠያቂያችን በመሰረቱ ለንስሐ ቀጠሮ አይሰጥም፤ ስለዚህ የመጀመሪያ ነገር መታወቅ ያለበት ይሄ ነው። የመዳን ቀን አሁን ነው ማለት ፥ በየጊዜው ያደረው እንዳይውልብን የዋለው እንዳያድርብን ነውና ለንስሐ ቀጠሮ መስጠት የለብንም። ሰው ዛሬ አጣዳፊ ድንገተኛ በሽታ ይዞት ለሞት የሚያበቃ ነገር ይዞት ፤ መሰናክል በዝቶብኛል ብሎ ወይም አሁን ጊዜ የለኝምና ልዋልና ልደር ነገ ከነገወዲያ ሀኪም ጋር ሄዳለው አይባልም እኮ፤ እንደዚሁ ሁሉ የንስሐ ህይወት የነፍስ ጉዳይ ስለሆነ ከዚህ ባለፈ ነው መታየት ያለበት። ያኛው የስጋ ደዌ ነው ወደ ድንገተኛ ክፍል ቶሎ አስቸኩለን እንድናስገባው የሚያስገድደን፤ ይሄ ደግሞ የነፍስ ደዌ ነውና በአስቸኳይ ወደ ንስሐ አባት መሄድ ይገባናል።
ለረጅም ጊዜ ቀኖና የሚያስፈልገውን በየደረጃው አባቶች ናቸው ቀኖናውን በመስጠት የህክምና መሳሪያቸው በእጃቸው ስለሆነ፤ ቀላሉን ደግሞ ቶሎ ብለው ለማውረድ ብለው ብዙ ሸክም የበዛበትን ሰውም በአንድ ጊዜ አካብደውበት በሸክም ላይ ሸክም አያሸክሙትም። ቀለል ባለ ሁኔታ ምክር ትምህርት ተግሳፅ እየሰጡት ወደ እግዚአብሔር አቅርበውት ከሰይጣን እጅ አውጥተውት እያስታመሙት ያስተምሩታል። መድሃኒትም እኮ ቢሆን በአንድ ጊዜ አይሰጥም ለምሳሌ መጀመሪያ ግሉኮስ ውሰድና አቅም ስትገዛና ስታገግም ይሄኛውን ትቀጥላለህ ነው የሚሉት እንጂ በሽታው በገባው ሰው የማይችለውን መድሃኒት ሰጥተው ለሞት አደጋ አያጋልጡትም ሃኪሞቹ፤ መንፈሳዊ እርዳታም እንደዚሁ ነው። ይሄንን ኀጢአትና የመሰናክል ፈተና የበዛበትን ሰው ፍፁም ወደሆነ የንስሐ ቀኖና ለማድረስ ተከታታይ ምክር ትምህርት ሰጥተው ለንስሐ ያበቁታል ማለት ነው።

ስለዚህ መሰናክል የበዛብዎት አባላችን በዚህ አይነት እንዲመለከቱት እባክዎን። መሰናክል ይመጣ ዘንድ የግድ ነውና ደግሞ ለሚያሰናክል ለዚያ ለእየእለት አሰናካያችን በፍጹም ለሁላችንም የጋራ የህይወት ችግራችን ሰይጣን ነው። ጥቃቅኑንም ከራሳችን ከግል ስራ ጀምሮ ከቤተሰብ አስተዳደር ጀምሮ የማህበራዊ ጉዳዮችንም ጀምሮ የውስጥም ሆነ የውጭ መሰናክሎች ልክ እንደ ንስሐ መግባት ቀጠሯችን እንዲረዝም ይሄን ሁሉ ፈተና የሚያመጣብን ከላይ እንደጠቀስነው ለሁሉ ነገር አሰናካይ ሰይጣን ነው። ስለዚህ እርስዎ ይሄን ተረድተው በቆራጥነት ወስነው ንስሐ መግባት እንዳለብዎት፤ አኛንም በውስጥ መስመር አግኝተውን ወደኋላ ያስቀረዎትን ጉዳይ በግልጽ ሲነግሩን ለዚያ የሚሆነውን ተገቢ ምክርና መፍትሄ ምን ማድረግ እንዳለብዎት መንገዱን እንመክርዎታለን አቅጣጫውን እናሳይዎታለን።
ስለዚህ ጠያቂያችን መንፈሳዊ ስራ ልስንሰራ ስንል መሰናክል አለ፤ በረቂቅ ገመድ ከኋላ ሆኖ ወደ ፊት እንሂድ ስንል ወደኋላ የሚጎትተን መንፈስ አለ ። በእርግጠኝነት እርስዎ እንዳሉት ለእርስዎ መሰናክል ነው፤ ግን ቁጭ ብለን ብናወራበትና ችግሩን ከመንፈሳዊ አንፃር ብናየው መሰናክል አይሆንም፤ ስለዚህ አንድ ሰው ይሄንን መሰናክል የመሰለውን ይሄ እሩቅ መንገድ የመሰለውን ፈተና በቁርጠኝነት ወስነው ያለምንም ፍርሃት እንዲሄዱበት የሚያስችል አንድ የእግዚአብሔር ፀጋ ያደረበት አንድ አባት መካሪና አስተማሪ መያዝ ያስፈልጋል። ዋናው ነገር ደግሞ ደጋግመው ይጸልዩ ይህ ፈተና ይህ መከራ ካለ ጸሎትና ጾም ካለስግደት ወደ እግዚአብሔር እርስዎን ካለመቅረብ ቅዳሴውን ቃሉን ካለመስማት ሌላ አዋጪ መፍትሄ የለም። ይህ የስጋ ዘመድ ዲያብሎስ ያለጸጾምና ያለጸሎት ከቶ አይወጣም ብለዋልና ስለዚህ ጸሎት ትልቁ ሃይላችን ነው። ጸሎት ደግሞ ከምን እንደሚጀምር ከዚህ በፊትም ተነጋግረናል፤ እንዲያው አጭሯ ጸሎት አባታችን ሆይ የሚለው አቅሟና የምትሰራው ሃይል ከባድ ነው ብለናልና ጠያቂያችን በዚህ ተረድተው ይህን ፈተና እንዲያልፉት እንመክራለን።

ቴሌግራም ግሩፓችንን በየቀኑ ይከታተሉ፣ ለወገኖትም ሼር ያድርጉ፦
https://t.me/+ReLdpifiso4Sz04q 

👉ጥያቄ፦ ሰላም 🙏እኔ ያለሁት ሰበታ የሚባል አካባቢ ነው፤ እና በእናንተ በኩል ንስሐ አባት እንዴት ማግኘት እችላለሁ በጣም ለበዙ ጊዜ አምላኬን አሳዝኜዋለሁ አሁን ግን የእናንተ አባል ከሆንኩ በኋላ ብዙ ትምህርት እና የፈጣሪ ፍቅር ገብቶኛል፤ ስለዚህ ንስሐ መግባት እፈልጋለሁ፤ እባካችሁ አባቶቼ እርዱኝ🙏🙏🙏😢😢

መልስ፦ ጠያቂያችን፤ ከምንም በላይ በዚህ ድረገጽ የምናስተላልፈውን ትምህርት ተከታትለው በግል ህይወትዎ ለንስሓ ህይወት የበቁበት እድል እንደሆነ ከላኩልን መእክት ስንመለከት በእኛም በኩል እግዚአብሔር በፈቀደልን መጠን የዘራነውን የእግዚአብሔር ቃል ፍሬ እንዳፈራ ስላስተዋልን በእጅጉ እንዲህ አይነት የእምነትና የምግባር ሰዎችን እግዚአብሔር እንዲያበዛ ከወዲሁ ያለንን ልባዊ ምኞት እንገልፃለን። ሌሎች አባላትም እንደዚሁ የደረሳችሁበትን በሂደት የማሳወቅ ልምደሰ ቢኖር እኛም የአገልግሎታችንን ተደራሽነትና ውጤታማነት የምንለካበት አንዱ መንገድ ከመሆኑም በላይ በአባላት መካከልም የህይወት ተሞክሮን ማካፈል አንዱ መማማርያና መመካከርያ መንገድ ይሆናል ብለን እናምናለን።

ጠያቂያችን፤ ወደ ጠየቁን ዋና ጉዳይ ስንመጣ፤ ንስሐ ለመግባት ወይም ወደ ንስሐ ህይወት ለመምጣትና ኅጢአትን ለመናዘዝ ቅድሚያ ሰጥተው ለንስኀ መዘጋጀትዎ ከእውነተኛ ክርስቲያን የሚጠበቅ ታማኝነትና ከምንም በላይ የተቀደሰ ተግባር ነው ። እንዳሉትም እግዚአብሔር የፍቅር አምላክ ነውና ሁሌ እጆቺን ዘርግት ኑ ልጆቼ በማለት በንስሐ እንድንመለስ ይጠብቀናል።

ነብዩ ሕዝቅኤል እግዚአብሔር የሰውን ሞት የማይወድ እና ሰው ወደ ንስሐ መመለሱን የሚወድ መሆኑን ሲናገር ”ንሰሐ ግቡ፤ ኀጥያትም እንቅፋት እንዳይሆንባችሁ ከኀጥያታችሁ ሁሉ ተመለሱ። የበደላችሁትን በደል ሁሉ ከእናንተ ጣሉ። አዲስ ልብ እና አዲስ መንፈስም ለእናንተ አድርጉ፤ ..ስለምን ትሞታላችሁ የሟችን ሞት አልፈቅድምና ይላል ጌታ እግዚአብሔር። ስለዚህ ተመለሱ እና በህይወት ኑሩ። (ሕዝ 18፥30-32)

ስለዚህ በእኛ በኩል፥ በህይወታቸው ምሳሌ ይሆናሉ ብለን ለአባትነት የመረጥናቸው የቤተክርስቲያን አባቶች በሃይማኖታቸውና በእውቀታቸው የታመነባቸው አባቶች ስላሉ የመዳን ቀን አሁን ስለሆነ የቀጠሮ ቀን እና ሰዓት ሳያራዝሙ በድረገፃችን ላይ ባለው ቁጥር ወይም ደግሞ በውስጥ መስመር በላክንልዎ ቁጥር ደውለው የሚያገኟቸውን አባት ያማክሯቸውና በአካባቢዎ ካሉ ካህናት ጋር ሊያገናኞት ይችላሉ።

ተጨማሪ መንፈሳዊ ምክርና ትምህርት ድረገጻችን Yohannesneseha.org/ጥያቄና-መልስ ላይ ያገኛሉ

👉ጥያቄ፦ አዲሱን አመት በ#ንስሐ መቀበል እፈልጋለው፤ #ንስሐ_አባት ግን የለኝም…ምን ትመክሩኛላቹ አባቶቼ?

መልስ፦ ጠያቂያችን፤ ማንም ክርስቲያን አለ ንስሐ አባት አንድ ቀንም መኖር የለበትም፤ አሁንም እርስዎ አዲሱን አመት በንስሐ መቀበል መፈለጎትን እያደነቅን፤ አበአሰቡት አላማ ጸንተው እንዲፈጽሙም አደራ እንላለን። የተነሱበትን የዘመን መለወጫ ፥ አዎ እንዳሉትም አሮጌውን አመት አሳልፈን አዲሱን አመት የምንቀበልበትን መስከረም 1 ቀን በኢትዮጵያ ኦርቶዶክስ ተዋህዶ ቤተክርስቲያን አስተምህሮ ርዕሰ ዐውደ አመት ፣ ቅዱስ ዮሐንስ፣ አዲስ ዘመን መለወጫ ተብሎ ይጠራል። ሃይማኖታዊ መሰረቱን በሚመለከት መጥምቀ መለኮት ቅዱስ ዮሐንስ “እነሆ፥ መንገድህን የሚጠርግ መልክተኛዬን በፊትህ እልካለሁ የጌታን መንገድ አዘጋጁ ጥርጊያውንም አቅኑ እያለ በምድረ በዳ የሚጮኽ ሰው ድምፅ” ተብሎ በነቢዩ ኢሳይያስ በተነገረለት የትንቢት ቃል መሰረት የካህኑ የዘካርያስ እና የቅድስት ኤልሳቤጥ ልጅ መጥምቀ መለኮት ቅዱስ ዮሐንስ አመተ ኩነኔ፣ አመተ ፍዳ፣ አመተ አለም ተብሎ የሚጠራው 5500 ዘመን መደምደሚያ እና የአዲስ ኪዳን ዋዜማ ላይ ሆኖ “መንግስተ ሰማያት ቀርባለችና ንስሓ ግቡ እያለ ስለመሲህ ክርስቶስ መምጣት እና ስለአዳኝነቱ ስለባሕሪይ አምላክነቱ በምድረ በዳ እየመሰከረ የንስሓ ጥምቀትን በማጥመቅ ለኃጢአተኞች ሁሉ የኀጢአት ስርየትን እየሰበከላቸው የብሉይ ኪዳን የመጨረሻ ነብይ እና የአዲስ ኪዳን የመጀመሪያ ሐዋርያ ምስጢር መሆኑን እንረዳለን። መጥምቀ መለኮት ቅዱስ ዮሐንስ ለአዲስ ኪዳን ዘመን የመሸጋገርያ ድልድይ ሆኖ መገለጡን በመረዳት የቤተክርስቲያን አባቶች የዘመን መለወጫ በአልን ሲደነግጉ የመጥምቁ ቅዱስ ዮሐንስ መታሰብያ በአል በየአመቱ መስከረም 1 ቀን እንዲከበር የዘመኑ መጀመሪያ በሱ ስም እንዲጠራ ወስነዋል። ማስረጃ (የቅዱስ ዩሐንስ አፈወርቅ ድርሳን ገፅ 1/3)

የሰው ልጅ እግዚአብሔር በረዳው እና እሱም ቀና ሲሆን ዘመናትን እየዋጀ እግዚአብሔር ያለዋጋ በልግስና የሰጠንን ገንዘብ የማይገዛውን ጊዜ ፥ ለማይጠቅመን፣ ለውጥ ለማያመጣልን፣ ለክፉ ስራ ወይም ደግሞ በነፍሳችን ለምንጎዳበት የኀጢአት ስራ ከምናውለው ይልቅ እኛ በነፍስ እና በስጋ ለሚጠቅመን በሃይማኖት እና በምግባር ለሚያፀናን፣ ከሰው ልጆች ሁሉ ጋር በሰላም እና በፍቅር ለመኖር ለሚያስችል ጠቃሚ አላማ ላይ ብናውለው ያኔ ትርፋማ ያደርገናል። ሐዋርያው ቅዱስ ጳውሎስ “ዘመኑን ዋጁ” (ኤፌ5፥15) በማለት እያንዳንዱን ዘመን በመመርመርና በጥንቃቄ መመልከት እንደሚያስፈልገን ተናግሯል።

ስለዚህ ጠያቂያችን፤ ወደ ጥያቄዎ ስንመጣ ከላይ እንደገለጽነው ንስሐ አባት መያዝ መንፈሳዊ ግዴታው ነው። በረቂቅ እና በሚስጢር አሠራር ቅዱሳን መላዕክት የኛ ጠባቂ ሆነው ይቆማሉ። በዚህ በገሃዱ አለም ደግሞ እንደ አንድ ክርስቲያን በምንኖርበት ህይወት ውስጥ ካህናት አባቶቻችን ለእኛ የነፍስ እረኞች ሆነው በእግዚአብሔር ዘንድ ተሹመዋል። ስለዚህ ንስሓ አባት መያዝ የሰው ትዕዛዝ ሳይሆን የፈጣሪ መመሪያ ነው።

ስለሆነም ጠያቂያችን፤ የምንመክርዎት መልካምን ነገር ወስነዋልና አሁንም በአሰቡት አላማ ጸንተው የቀጠሮ ቀን እና ሰዓት ሳያራዝሙ ይመክረኛል ያስተምረኛል ያሉትን የንስሓ አባት የሚሆን ካህን በአካባቢዎ ካሉ ይያዙ፤ በአከባቢዎ ማግኘት የማይችሉ ከሆነ በራስዎትም ሆነ በሚያምኑት ሰው በኩል አጠያይቀው ያገኙዋቸውን እውነተኛ ካህን በርቀትም ቢሆን ይያዙ፤ ወይም ደግሞ በእኛ በኩል በህይወታቸው ምሳሌ ይሆናሉ ብለን ለአባትነት የመረጥናቸው የቤተክርስቲያን አባቶች በሃይማኖታቸውና በእውቀታቸው የታመነባቸው አባቶች ስላሉ በድረገፃችን ላይ ባለው ቁጥር ወይም ደግሞ በውስጥ መስመር በሚላክልዎ ቁጥር ደውለው የሚያገኟቸውን አባት አነጋግረው ንስኀዎን መፈጸምም እንዲሁም ንስሐ አባት በማድረግ መያዝ እንዳሉትም በየጊዜው በጸሎት እንዲያስቡዎት መጠየቅ እንዲሁም ማንኛውንም መንፈሳዊ አገልግሎት ማግኘት ይችላሉ።

በተጨማሪም፤ ስለ ንስሐ ፣ ስለ ንስሐ አባት እና ሌሎችም መንፈሳዊ ትምህርቶች በድረገጻችን ላይ መጽሐፉ ቅዱስን መሰረት አድርገን ሰፊ ትምህርት የሰጠንበት ስለሆነ በዚያም እየተከታተሉ የበለጠ ግንዛቤ ቢያገኙ መልካም ነው።

ተጨማሪ መንፈሳዊ ምክርና ትምህርት ድረገጻችን Yohannesneseha.org/ጥያቄና-መልስ ላይ ያገኛሉ

👉ጥያቄ፦ #ንስሐ ከስንት አመት ጀምሮ ነው መግባት የሚቻለው??

መልስ፦ጠያቂያችን ከዚህ በፊት “ከስንት አመት ጀምሮ ስለሰራነው ኀጢአት ነው ንስሓ የምንገባው?” የሚል ተመሳሳይ ጥያቄ ቀርቦልን የሰጠነውን ምላሽ አንብበው ሃሳቡን ይረዱት ዘንድ እንደሚከተለው ልከንልዎታል፦

ሴትም ይሁን ወንድ ልጅ ለአካለ መጠን ከደረሱበት ጊዜ ጀምሮ እያወቁ በፈጸሙት የኀጢአት በደል በነፍስ ስለሚጠየቁ ንስሓ መግባት እንዳለባቸው የቤተክርስቲያን ቀኖና ይደነግጋል።

ተጨማሪ መንፈሳዊ ምክርና ትምህርት ድረገጻችን Yohannesneseha.org/ጥያቄና-መልስ ላይ ያገኛሉ