ጠያቂያችን በአንድ መጠጥ ቤት ተቀጥሮ በመስራት መተዳደሪያው የሆነ ሰው መጠጥ ጠጥቶ የሰከረው ሰውና በስካር መንፈስም በሚያደርገው ያልተገባ ነገር ሰራተኛው (አስተናጋጁ) በነፍስም ሆነ በሥጋ ሊያስጠይቀው አይችልም። እንኳንስ አስተናጋጁን ይቅረና የንግድ ቤቱ ባለቤት የሆነው ሰው ሳይቀር ምናልባት ሰዎችን በመጠጥ የሚያደነዝዙበትን የመጠጥ ቤት ከፍቶና ሰውየውን የሚጎዳውን መጠጥ የማቅረቡ ሁኔታ ያስጠይቀው እንደሆነ እንጂ ተጠቃሚው ወዶና ፈቅዶ በራሱ ገንዘብ በሚጠጣው ግን ተጠያቂ አይሆንም። ምክንያቱም በዚህ በፈተናው ዓለም ውስጥ በተለያየ ችግር ውስጥ ያሉ ሰዎች ህይወትን ለመምራት የማይገቡበት የስራ መስክ የለምና ሰውን አጠጥቶ ለማስከር አስበው ሳይሆን እነሱ ጉልበታቸውን አድክመው እና ማድረግ የማይገባቸውን ሳይቀር ለኑሮ ሲሉ እራሳቸውን ዝቅ አድርገው በመታዘዝ በሚያገኙት እለታዊ ወይም ወርሃዊ ደሞዝ ራሳቸውን እና ቤተሰብ ለመምራት እስከሆነ ድረስ የእነዚህ ሰዎች ህይወት ያሳዝን እንደሆን እንጂ አልፎ ተርፎ ገንዘብ ተርፎት ጠጥቶ በስካር መንፈስ የማይገባውን ለሚፈፅመው ኀጢአት አስተናጋጆች ሊጠየቁም ሊወቀሱም እንደማይችሉ በአጭሩ እያሳወቅን በተጨማሪም ስለ ስካርና ስለሰካራሞች መፅሐፍ ቅዱስ የሚናገረውን መመልከት ይቻላል።

ከራስ ጋር የዝሙት ሃሳብ በስጋችን ላይ የስነልቦና ተፅኖ ከማሳደሩም በላይ ነፍሳችንንም በኀጢአት የሚያስጠይቃት ኢክርስቲያናዊ ግብር ስለሆነ እንደምንም ታግሎ ማሸነፍና ከዚህ ፆር ፈጽሞ መለየት ያስፈልጋል። ለዚህ አይነት ችግር እንዴት መዳረግ እንደሚቻል በደንብ መለየት ከቻልን የነገሩን መንስኤና ዋና ምክንያት እራሱ ግለሰቡ ነው ማለት ይቻላል። ምክንያቱም ሰይጣን አንድን ክርስቲያን በኀጢአት የሚጥልበትን መንገድ ወይም ምክንያት የሚያገኘው ከሰው ልጅ የዝንባሌ አስተሳሰብ ተነስቶ ነው። ምክንያቱም የተከፈተን በር ማንም ሰይ ሊገባበት ይችላልና ነው። ሌባና ወንበዴ አጥር የሌለው ግቢ ቢያገኝ በፈለገው ጊዜ ገብቶ የፈለገውን ማድረግ ይችላልና በደንብ ታስቦበት ሌባነና ወንበዴን ለመከላከል በሚያስችል ሁኔታ ቤቱን ያጠረ እና በሩን ያጠበቀ ሰው እንኳንስ ሌባ ቀርቶ ለሰላማዊ ዝምድና ለሚመጣ እንግዳ እንኳን በስርዓት በሩን አንኳክቶ ሲከፈትለት ብቻ በስርአት ሊገባ ይችላል። በዚህ መሰረት ጠያቂያችን እራሳችንን ለማይረባ ነገርና እጅግ የመንፈስ እረፍት ለሚነሳ ኀጢአት አሳልፈን ከመስጠታችን በፊት በፅናትና በትዕገስት ሆነን በአባቶች ምክርና ፀሎት ራሳችንንም በፀሎት በጾምና በስግደት ወስነን ሳንሰለች በትጋት ብንታገል ይህ የኀጢአት ፈተና ከኛ እንደሚወገድ አያጠራትርም። በእርስዎ በኩልም እንደተነገረው ለአንድ ሳምንት ያህል እስካሁን ከነበሩበት ፈተና ተለይተው መቆየትዎ የድህነት ምልክት ስለሆነ ከዚህ ኀጢአትም ለመለየት እየታሉ ስለሆነ አሁንም ወስነውና ጨክነው ሃሳቡ በመጣብዎት ጊዜ እራሶትን ወደዚያ የጥፋት ሃሳብ ከመገፋፋት ተቆጥበው የኀጢአቱም መጠን ከፍተኛ ደረጃ መሆኑን ተገንዝበው በፅናት ሆነው ከበረቱ በአንድ ጊዜ ማቆም ይችላሉና አሁንም በፀሎት እና የእግዚአብሔርን ቃል በማንበብ ያቺን የፈተና ጊዜ እያሳለፉ ያለዎትን መንፈሳዊ ትግል ሳያቋርጡ በመቀጠል ማቆም አለብዎት። በተጨማሪ ከዚህ በፊት በዚህ ጉዳይ ዙሪያ ያሉትን ፈተናዎች ሰፋ ያለ ማብራሪያና ምላሽ ስለሰጠንበት እሱንም ከድረገፁ ላይ እንዲያነቡት እንመክራለን። ተጨማሪ ምክር እና መንፈሳዊ እገዛ ካስፈለገዎት በውስጥ መስመር በምንልክልዎ ቁጥር ደውለው ቢያገኙን ተከታታይ  ትምህርት እና ምክር ለመስጠት እንችላለን። 

ጠያቂያችን በሙሴ ህይወት ታሪክ ውስጥ የተመዘገበና ሙሴ የፃፋቸው የኦሪት መፃህፍት በሃይማኖታችን ሊቃውንት የታወቀና የተረዳ ስለሆነ በህይወተ ስጋ እያለ እንጂ ከሞተ በኋላ አይደለም። ምናልባት በጠቀሱት ቃል ውስጥ ለማለት የተፈለገው ሌላ ትርጓሜ ሊኖረው ስለሚችል ጥያቄዎን በውስጥ መስመር ደውለው በደንብ ቢገልፁልን ልናብራራልዎት እንችላለን።

ጠያቂያችን፤ ለድቁና የሚያበቃ ትምህርት ማለት በቤተክርስቲያን ውስጥ መንፈሳዊ አገልግሎት የምንሰጥበት ለእግዚአብሔርም ምስጋና የምናቀርብበት እውቀት ስለሆነ መማር አይከለከልም። ምክንያቱም ከርስቲያን ክህነት ባይኖረውም ሁሉንም የቤተክርስቲያናችንን መንፈሳዊ እውቀት የመማር እና የማወቅ ክርስቲያናዊ መብት አለው። ክህነት ደግሞ እራሱን የቻለ ፀጋ ስለሆነ ወደ ክህነት ለመጠራትም ራሱን የቻለ መስፈርት ስላለው ጠያቂያችን እንዳሉት እኛን በአካል ቀርበው ሲያነጋግሩን የቤተክርስቲያን ቀኖናና ስርዓተ በሚመራን መንገድ መሰረት ተገቢውን መፈፀም ይቻላል። ስለዚህ ትምህርቱን ቢማሩት ተፈላጊ ነው በማለት ይህ አጭር መልዕክት እንዲደርስዎት አድርገናል።

ጠያቂያችን ፤ ዝኒ ከማሁ ለሚለው ዘይቤያዊ አፈተቱን እና ትርጉሙን ብንገልፅ እርስዎ መልስ ለማግኘት ለጠየቁን ጥያቄ ጠቃሚ ላይሆንልዎት ስለሚችል፥ ወይም ሁሉም መፅሐፍ ላይ እንደዚህ ስለማይል፥ ይህን ቃል ያገኙበትን ፎቶ ኮፒ አድርገው ወይም ፎቶ አንስተው በውስጥ መስመር ቢልኩልን አይተን ከተረዳን በኋላ ምን ለማለት እንደተፈለገ ምስጢራዊ ትርጉሙን በመግለፅ ልናስረዳዎት እንችላለን። ከዚህ ውጪ ግን በዘይቤ ወይም የግእዝ ነጠላ ትርጓሜ ግሱን ብንፈታልዎት እርስዎ ለጠየቁት ሃሳብ ምላሽ ላይሆን ይችላል።

ስለ እራስን በራስ ማርካት ለጠየቁን አባላችን የተሰጠ መልስ፦ ይህ የኀጢአት አይነት ብዙ ወገኖችን የሚዋጋ መንፈስ እንደሆነ ከዚህ በፊትም በተደጋጋሚ ጥያቄው እየቀረበ በእኛም በኩል ከቤተክርስቲያን ቀኖና አንፃር መልስ የሰጠንበትን ጊዜ እናስታውሳለን። አሁንም በዚሁ የእርኩስ መንፈስ  ፈተና የወደቁ ወገኖችን መንፈሳዊ ምክር እንድንሰጣችሁ እስከፈለጋችሁን ድረስ እግዚአብሔር ፈቃዱ ሆኖ ከእያንዳንዱ ወገናችን ላይ ይህንን ሰይጣናዊ እርኩሰት ከሁሉም ሰው ተለይቶ ይጠፋ ዘንድ ወገኖችን መምከራችንን እና ማስተማራችንን አናቆምም።

እንደዚህ ያለውን የኀጢአት አይነት በአሁኑ ዘመናችን ብዙ ሰዎች የሚፈፅሙት የኀጢአት አይነት ቢሆንም እንኳን ነገር ግን በጣም የሚገርመው እግዚአብሔር የሰውን ልጅ ሲፈጥር ፍትወተ ስጋ ቢያሸንፈው እንኳን ለተፈጥሮ በባህሪው በሚስማማ ደረጃ ተፈጥሮአዊ ክብሩንም ሳያዋርድ ለወንድ ሴትን፥ ለሴት ደግሞ ወንድን ፈጥሮ ጊዜያዊ የስጋ ፈቃዳችንን እግዚአብሔርን ሳናሳዝን ራሳችንንም በኀጢአት ላይ ሳንጥል የተፈጥሮ ስብእናችንን ጠብቀን በህጋዊ መንገድ ስጋዊ ሩካቤ ማድረግ እየቻልን እንዲህ አይነቱን ከተፈጥሮ ውጪ የሆነ ከፍተኛ የኀጢአት አይነት ግን ከማን እንደተማርነው? እንዴትስ ሃሳቡ እንደመጣልን? ዝም ብለን ስናስበው ሰይጣን በእኛ ህይወት ላይ ዘወትር የኀጢአት ፈጠራን እያመነጨ የሰውን ልጅ እንዴት እንደሚያጠፋው እና እንዴት ከፈጣሪው እንደሚለየው የሚያሳይ ሰይጣናዊ ፈተና ነው።

ስለዚህ ይሄንን ፆር ወይም ፈተና ከእኛ ፈፅሞ እስከሚለይ ድረስ ሳንሰለች እና ተስፋ ሳንቆርጥ መዋጋት አለብን። ይህን የምንዋጋበት ዋናው መንፈሳዊ መሳሪያችን እና ማድረግ ያለብንም፦

1ኛ/ በየጊዜው ስንተኛም ስንነሳም ሳናቋርጥ የምንፀልየው የግል ፀሎት መኖር አለበት። ስለዚህ ዘወትር በፀሎት የእግዚአብሔርን ስም እየጠራን መለመን፣  

2ኛ/ በተቻለን መጠን ይህው መንፈስ እስከሚለቀን ድረስ የቤተክርስቲያን አባቶችን በማማከር ራሱን የቻለ የቀኖና ሱባኤ መያዝ፣

3ኛ/ አብዝተን በመስገድ፥ አብዝቶ በመስገድ እርኩስ መንፈስን መዋጋት ይቻላል።

4ኛ/ በምንተኛበት ክፍል አካባቢ የእግዚአብሔር መንፈስ እንዳይርቀን መዝገበ ፀበል፣ መስቀል ወይም የቅዱሳን ገድላት እና ድርሳናት ብቻ ከእርኩስ መንፈስ የመንከላከልበት የእግዚአብሔር መንፈስ ያለበትን ከእኛ አለማራቅ።

5ኛ/ ከዚህ በላይ በተለያየ ውጊያ የማይላቀቅ እርኩስ መንፈስ ከሆነ የተለየ ሱባኤ ይዞ መጠመቅ ፤ እነዚህን ሁሉ በእምነት በመፈፀም ከዚህ ውጊያ እንደሚላቀቁ እናምናለን።

በአጠቃላይ ግን በዋናነት አብዝቶ መፆም ፣ መፀለይ እና መስገድ ለዚህ አይነተኛ መፍትሄ መሆኑን በመረዳት እና በማመን እየወደቁም እየተነሱም ቢሆን ተስፋ ሳይቆርጡ መትጋት ያስፈልጋል።

ከዚህ ውጪ እርስዎ እንዳሉት ያዯትን ሴት ሁሉ ለዝሙት ማሰብም ሆነ ከሴት ጋር መግባባት አለመቻል ወይም ህልመ ሌሊት ማየት እንዲሁም በእምነት ደካማ እና ተጠራጣሪ መሆን  ይሄን ሁሉ ነገር የሚያደርገው የእርኩስ መንፈስ ውጊያ መሆኑን በደንብ ሊረዱትና ሊነቁ ይገባል። ስለዚህ አሁንም በአጽንዎት የምንመክርዎት የጀመሩትን መንፈሳዊ ብርታት ሳያቋርጡና ሳይጠራጠሩ ከላይ የዘረዘርናቸውን መንፈሳዊ ምክር በመጠቀም ያለማቋረጥ በማከናወን ተግተው ሊጋደሉት ይገባል። ባጠቃላይ ይህን ከራስ ጋር የዝሙት ሃሳብ መፈፀም ከፍተኛ የኀጢአት አይነት መሆኑን አውቀው እንደውም ከሰዶማዊነት ጋር የተያያዘ ሰይጣናዊ መንፈስ መሆኑን ተገንዝበው ጨርሶ ሊጠየፉትና ሊያቆሙት ይገባል። መክንያቱም ኀጢአትን ለማቆም የኀጢአቱን ስራ ከመሰረቱ መጥላት ያስፈልጋል። በተጨማሪም ሁሌ ይህ የኀጢአት ሃሳብ ወደ እርስዎ እየመጣ በተዋጋዎት ቁጥር የእግዚአብሔርን ስም፣ የእናታችንን የድንግል ማሪያምን ስም፣ የቅዱሳን መላዕክትን ስም፣ እና የቅዱሳን ፃድቃን ሰማእታትን ስም በመጥራት ወዲያውኑ ሰይጣን በአይምሮዎት ላይ የፈጠረውን ክፉ ምኞት ለመቃወምና ከእርስዎ ለማራቅ መቻል አለብዎት። ይህን ማድረግ ሲችሉ በእርግጠኝነት ከዚህ ፈተና እንዲወጡ አምላከ ቅዱሳን እግዚአብሔር ይረዳዎታል፤ እመቤታችን ድንግል ማርያም እና ቅዱሳኑም በፀሎት እና በምልጃቸው ከዚህ ፈተና ነፃ እንዲወጡ ያግዞታልና ይበርቱ! 

ተጨማሪ መንፈሳዊ ምክርና ትምህርት ድረገጻችን https://yohannesneseha.org/ ላይ ያገኛሉ

የወር አበባ በሴቶች ላይ በየወሩ የሚከሰት በተፈጥሮ የተሰጣቸው ፀጋ ሲሆን ይህም የማይቋረጥ የደም መፍሰስ ኡደት ነው። በቤተክርስቲያን ቀኖናዊ አስተምሮ የሴቶች የወር አበባ ‘ደመ ፅጌ’ ወይም ‘የአበባ ደም’ በመባል ይጠራል። ይህም በየወሩ ኡደቱን ጠብቆ እስከተወሰነ የእድሜ ደረጃ ድረስ የሚዘልቅ ነው።

የወር አበባ ላይ ያለች ሴት ከደም እስከምትነፃ ማግኘት የማትችለው መንፈሳዊ አገልግሎት፦ ቅዱስ ቁርባን አትቀበልም፣ ወደ ፀበል መጠመቂያ ቦታ ሄዳ መጠመቅ አትችልም የተቀደሰበትን ፀበል መጠጣት አትችልም፣ የቀደሰው ካህን ከቅዳሴ በኋላ አስቀዳሾቹን የሚባርካቸውን መባረክ ስርአት አታገኝም ሆኖም ካህናት አባቶች ህዝቡን ሲባርኩና እግዚአብሔር ይፍታ ሲሉ ባለችበት  ቦታ ቆማ ይሁንልኝ ይደረግልኝ በማለት በረከቱን ማግኘት ይቻላል። እንዲሁም ወደ ቋሚ ቅዱሳት ስዕላትና መስቀሉ ባለበት ወይም ልዩ ልዩ የፀሎት መፅሐፍት በሚገኝበት ልዩ የፀሎት ቤት ገብቶ መፀለይ እነዚህን የሚመሳስሉ ነገሮች ላይ መጠንቀቅ እንደሚያስፈልግ እንመክራለን። ሆኖም ግን ባለንበት መኖሪያ ቤታችንም ይሁን ከዋናው የቤተክርስቲያን ቅፅር ግቢ ውጪም ቢሆን መስቀል አትሳለሙ፣ ቁማችሁ፣ አታስቀድሱ፣ አትፀልዩ ቤተክርስቲያን አትሳለሙ የሚል ህግ የለም።  በግልዎት የሚፀልዩበትን የፀሎት መፅሐፍ አንስተው መፀለይም አይከለከሉም።

ጠያቂያችንም ሌላውም አካል መገንዘብ ያለባችሁ በአዲስ ኪዳን ዘመን ማንኛውም ወደ ቤተክርስቲያን እንዳንገባ የምንከለከልበት ጉዳይ ንፅህናንና ቅድስናን ወይም ፈሪሃ እግዚአብሔርን ከማሰብ አንፃር እንዲሁም ለኛም ሆነ ለእግዚአብሔር ጉባኤ ፈተናና መሰናክል እንዳንሆን ታስቦ እንጂ  እንደ ኦሪቱ ህግ እንደ እርኩስ ወይም እንደተረገመ አካል በመቁጠር አይደለም።  በእርግማን ምክንያት የመጣውን የዘር ኡደት ጥንተ አብሶ በክርስቶስ ሞት ሁላችንንም ከመርገም ኅጢአት ነፃ እንዳወጣን ቤተክርስቲያን ዘወትር ታስተምራለች። ሐዋርያዊ ቅዱስ ጳውሉስም “… ክርስቶስ ስለኛ እርግማን ሆኖ ከህግ እርግማን ዋጀን” በማለት በህግ የተፃፈውን እርግማናችንን በመስቀሉ ላይ ላንዴና ለመጨረሻ ጊዜ ፈፅሞ እንደሻረው ለገላትያ ሰዎች በፃፈው መልዕክቱ አስተምሮናል። (ገላ 3፥13)

ዋናው ቁም ነገር በውስጣችን ፈሪሃ እግዚአብሔር እንዲኖር ንፁህ የሆነውን አምላክ በንፅህና በቅድስና እንድናመሰግነው በፍፁም እምነት ሆነን እንድናመሰግነው ለማጠየቅ ስንል የወር አበባ ክፍለ ጊዜ ላይ ያሉ ሴቶችም ሆኑ ሌላ የተለያየ ኅጢአትም ሆነ የሥጋ ነገር የገጠማቸው ሰዎች ከዚያ ነገር እስከሚነፁና እግዚአብሔርን ሳይዳፈሩ በርቀት ሆነው ማመስገን የተለመደ ስርዓት ነው።

ስለዚህ ጠያቂያችን ሃሳቡን በዚህ ይረዱትና ተጨማሪ ማብራርያ ከፈለጉ ከዚህ ቀደም በዚህ ጉዳይ ተመሳሳይ ጥያቄ ቀረቦልን ያስተላለፍነውን ሰፊ ትምህርታዊ ማብራሪያ ከድረገጻችን ላይ ለማንበብና ለመረዳት እንዲሞክሩ መንፈሳዊ ምክራችንን እንለግሳለን።

ጠያቂያችን፤  “ስለ ጸሎተ ባርቶስ እየሰማነው ያለው ነገር እውነት ነው?” የሚለው የጥያቄዎ ሃሳብ  ግለጽ ስላልሆነልን ፤ በትክክል ተረድተን ምላሽ መስጠት እንዲያስችለን በዋናነት ለማወቅ የፈለጉትን ሃሳብ በቀጥት ግልጽ አድርገው በጽሁፍ ቢስቀምጡልን በዚያ  መሰረት አድርገን ማብራሪያ ልንሰጥበት እንችላለን።

ጠያቂያችን፤ ከዚህ በፊት ቀርቦልን የነበረውን ተመሳሳይ ጥያቄ መሰረት በማድረግ  ያስተላለፍነው ምላሽ ውስጥ እርስዎ አሁን ላቀረቡት ጥያቄ መልስ የሚሆን ማብራርያ ሰጥተንበታልና አንብበው ሃሳቡን ይረዱት ዘንድ ከዚህ በታች ልከንልዎታል።

ቀርቦ የነበረው ጥያቄ: ፦ ሴት ልጅ በወር_አበባዋ ጊዜ ዳዊት ይዛ መፀለይ ትችላለች በጣም ማወቅ እፈልጋለሁ ትክክለኛውን መልስ ይቻላል አይቻልም እያሉ እያወዛገቡኝ ስለሆነ ነው።

የሰጠነው መልስ ፦  የወር አበባ ላይ ያለች ሴት ወደ ቤተክርስቲያን ውስጥ መግባትና ቆሞ ማስቀደስ፣ የቀደሰውን የካህን መስቀልን የመሳለም ስርዓት መፈፀም፣ ፀበል ቦታ መጠመቅና በመስቀሉ መዳበስ ወደ ቋሚ ቅዱሳት ስዕላትና መስቀሉ ባለበት ወይም ልዩ ልዩ የፀሎት መፅሐፍት በሚገኝበት ልዩ የፀሎት ቤት ገብቶ መፀለይ እነዚህን የሚመሳስሉ ነገሮች ላይ መጠንቀቅ እንደሚያስፈልግ እንመክራለን። ሆኖም ግን ባለንበት መኖሪያ ቤታችንም ይሁን ከዋናው የቤተክርስቲያን ቅፅር ግቢ ውጪም ቢሆን መስቀል አትሳለሙ፣ ቁማችሁ፣ አታስቀድሱ፣ አትፀልዩ ቤተክርስቲያን አትሳለሙ የሚል ህግ የለም።  በመቀጠልም እርስዎ ያነሱትን በሚመለከት በግልዎት የሚፀልዩበትን የፀሎት መፅሐፍ አንስተው መፀለይ አይከለከሉም። አንገታችን ላይ ከጠላት እንዲጠብቀን ያሰርነውን መስቀል ወይም ደግሞ ስዕል ወይም ደግሞ የፀሎት መፅሐፍ ቢኖር ከኛ አንድናርቀው አንገደድም። ዋናው ቁም ነገር በውስጣችን ፈሪሃ እግዚአብሔር እንዲኖር ንፁህ የሆነውን አምላክ በንፅህና በቅድስና እንድናመሰግነው በፍፁም እምነት ሆነን እንድናመሰግነው ለማጠየቅ ስንል የወር አበባ ክፍለ ጊዜ ላይ ያሉ ሴቶችም ሆኑ ሌላ የተለያየ ኅጢአትም ሆነ የሥጋ ነገር የገጠማቸው ሰዎች ከዚያ ነገር እስከሚነፁና እግዚአብሔርን ሳይዳፈሩ በርቀት ሆነው ማመስገን የተለመደ ስርዓት ነው። ስለዚህ ጠያቂያችን ሃሳቡን በዚህ ይረዱትና ተጨማሪ ማብራርያ ከፈለጉ ከዚህ ቀደም በዚህ ጉዳይ ተመሳሳይ ጥያቄ ቀረቦልን ያስተላለፍነውን ሰፊ ትምህርታዊ ማብራሪያ ከድረገጻችን ላይ ለማንበብና ለመረዳት እንዲሞክሩ መንፈሳዊ ምክራችንን እንለግሳለን።

ጠያቂያችን፤   አንዲት ሴት ፅንስ በማህፀንዋ ካደረበት እለት ጀምሮ 9 ወር ከ5 ቀን የእርግዝና ጊዜ የምታሳልፍበት ወቅት ነው። በዚህ የእርግዝና ወቅት ከእርግዝና  በፊት የምትሰጠውን መንፈሳዊ አገልግሎት ሙሉ በሙሉ ማከናወን አቅምዋ ስለማይፈቅድና ስለሚደክማት ፣ የተሸከመችውም ሃላፊነት ከባድ ስለሆነ ማንኛውንም መንፈሳዊ ግዴታዋን ከሌላ ጊዜ እየቀነሰች እንደምታሳልፍ ስርአተ ቤተክርስቲያን ይፈቅድላታል። በመሆኑም ስለ ጾም፣ ስለ ስግደት ፣ ስለ ፀሎት እና ቆሞ ስለ ማስቀደስ ፣ ስለ መቁረብ የምታደርገውን መንፈሳዊ ስርአት ታደርግ በነበረው መጠን ብትቀጥል በአካልዋ ላይ የሚከሰቱ የጤና ችግር ስለሚኖሩ ከዚህ አንፃር በቅርብ በመንፈሳዊ አባትነት የሚጠብቋትን የንስኀ አባት እያማከረች ከጊዜ ወደ ጊዜ አገልግሎቱ እየቀለላት እንዲሄድ ይደረጋል።  ምንም እንኳን የተረጋጋ አካላዊ እንቅስቃሴዋ የበረታ ከሆነ እስከተወሰነ የፅንስ ጊዜዋ ፆምን ለተወሰነ ጊዜ እየጾመች ወደ ቤተክርስቲያን ሄዳ ቁማ መፀለይ፣ ቤተክርስቲያን መሳለም፣ ማስቀደስ ፣ መስቀል መሳለም፣ ፀበል መረጨት በአጠቃላይ እነዚህን መንፈሳዊ አገልግሎቶች እያገኘች መመለስ ትችላለች። የፅንሱ ጊዜ እየገፋ እየደከማት ሲመጣ ግን በቤትዋ ሆና ፆሙን እየቀነሰች መፆም ትችላለች፣  ያትችልበት ደረጃ ከደረሰችም ስለእርሷ መንፈሳዊ አባቷ በፆምም በፀሎትም ስለሚያስቧት እሷ ግን እንድትፆምና ሌሎቹን መንፈሳዊ አገልግሎቶች እንድትፈፅም እንደማትገደድ ቤተክርስተያን ስርዓት ያዛልና ጠያቂያችን ሃሳቡን ከዚህ አንፃር እንዲመለከቱት የህን አጭር መልዕክት ልከንልዎታል።

ጠያቂያችን፤ ጻድቃኔ ማርያም የሄደ ሰው ቡና መጠጣት የለበትም ይባላል ብለው ለጠየቁን አባላችን የተሰጠ ምላሽ። ከዚህ በፊት ስለ ቡና መጠጣት ወይም አለመጠጣት እንደገለፅነው አሁንም በተጨማሪ የምንለው የቡና እፅዋትና ፍሬ  እግዚአብሔር የፈጠረው ሲሆን ማንም ሰው እግዚአብሔር በስነ ተፈጥሮ ለበጎ የፈጠረውን ማንኛውንም አትክልቱንም አዝሪቱንም እፅዋቱንም ሌሎቹንም ፍጥረታት የሰው ልጅ በአግባቡ እንዲገለገልባቸው የተሰጠንን ወደጎን ትተን ለተለያየ አምልኮት ወይም ደግሞ የሰይጣን ግብር ማስፈጸሚ የሚሆን የኀጢአት ስራ ከያዝናቸው ማንኛውም ነገር ከእግአብሔር ጋር ያጣላናል። እኛም ቢሆን መንፈሳዊ ህይወታችንን ያሳጣናል።
ስለዚህ ቡና በክርስቲያናዊ ስነምግባር ክልክል የሚሆነው  በልዩ አምልኮትና ልማድ ሁነን በሱስ መንፈስ የምናደርገው ከሆነ ነው። ከዚህ ውጭ ግን ለምግበ ስጋ ከምናውላቸው የእለት ምግቦቻችን እና መጠጦቻችን ከቆጠርነው ግን ከምንም ነገር ጋር ሳናያይዝ የተጠቀምነው ስለሚሆን ሆዳችንን ከመሙላት አልፎ ከመንፈሳዊ ህይወት ጋር የሚያጣላ ምስጢር የለውም።

በተጨማሪ ማንም ክርስቲያን በራሱ ውሳኔ ወደ ቅዱሳን መካናት ማለትም እንደ ጻድቃኔ ማርያም ገዳማት ሄደን በቃል ኪዳን ከዛሬ ጀምሮ ይህን አልባለም ፣ ይህን አልጠጣም ብሎ በራሱ ፈቃድ ቃልኪዳን ከገባ አለመብላት፣ አለመጠጣት ይችላል። በቃለመሃላ አንድን ነገር ላለማድረግ ሰው ከወሰነ በራሱ ፀጋ የሚደረግ ቃልኪዳን ይሆናል ማለት ነው። ምክንያቱም በገዳማት ያሉ መናኞች በአለም ውስጥ ያለውን የማይበሉ የማይጠጡ ሰውነታቸውን ጎድተው የሚኖሩ አሉና ይህ ልዩ ቃልኪዳን ይባላል። ስለመንፈሳዊ ህይወት አብዝተው ስለተጋደሉ እግዚአብሔር አብዝቶ በበረከት ላይ በረከት ይጨምርላቸዋል።

ስለዚህ ጠያቂያችን እዛ ገዳም ውስጥ ያሉ አባቶች ምናልባት በቃል ኪዳን አንድን ሰው ቃል የሚያስገቡ አባቶች ካሉ እዛ ያሉ አባቶች እና እዛ የሄደውና ቃል የገባው ሰው የሚያውቁት ቃልኪዳን ስለሆነ በእኛ በኩል የሚፈታ ስላልሆነ ሃሳቡ ከዚህ አንፃር መታየት አለበት።

በሁለተኛ ደረጃ ለበአል ፕሮግራም ቡና ሲያፈሉ አረቄ ሲከፍቱ አንዳንድ ቤት ይበትናሉ ያፈሳሉ የተባለውን በሚመለከት ይህ ከባእድ አምልኮት ጋር የተያያዘ ስለሆነ ፈፅሞ የተከለከለ ነው። እርኩሳን መናፍስት ደግሞ ይህን ልማዳቸውን ለማግኘት ሲሉ በረቂቅ ተሰውረው ያንን የለመዱትን ነገር እንዲሰጣቸው ወደዚያ የአምልኮት አገልግሎት ስለሚቀርቡ በራሱም ህይወት ሆነ በሰው ህይወት ውስጥ ከባድ ፈተና ስለሚያመጡ በቤተክርስቲያን ስርዓት ፈፅሞ የተከለከለ ነው።

 በህማማቱ የማህበር ፅዋ መጠጣት (ማውጣት) በተመለከተ ለጠየቁን አባል የተሰጠ ምላሽ፦ በመሰረቱ ሰሞነ ህማማት በመባል የሚታወቀው ሳምንት ጌታችንና መድኃኒታችን ኢየሱስ ክርስቶስ የሰውን ልጅ ለማዳን በራሱ ፈቃድ በአይሁድ እጅ የተቀበለውን ህማማተ መስቀል እያሰብን የምንፆምበት ፣ የምንሰግድበት ፣ የምንፀልይበት እና የግብረ ህማማቱን ንባብ የምንሰማበት ሳምንት ነው። በዚህ ሳምንት በቤተክርስቲያን ቀኖና የማይፈፀሙ ብዙ ምስጢራት አሉ። ይህ ማለት ቅዳሴ አይቀደስም፣ ሰው ቢሞት ፀሎተ ፍታት አይደረግም፣ መስቀል መባረክ አይቻልም፣ እግዚአብሔር ይፍታህ አይባልም፣ ድርሳናት እና መልካ መልክ አይፀለይም፣ እንዳሉትም በቤተክርስቲያንም ሆነ ከቤተክርስቲያን ውጪ በማህበር የምንሰበሰብባቸው የፅዋ መሀበር አይጠጣም፣ በአላት አይከበሩም፣ በአጠቃላይ እነዚህን የመሳሰሉ ስርዓቶችን ከሌላው ጊዜ በተለየ ሁኔታ የማናከናውንበት ሳምንት ነው ማለት ነው።

ይህ የሆነበት ዋና ምክንያትም ፦

1ኛ/ የሁላችን አምላክ ፈጣሪ ኢየሱስ ክርስቶስ ስለ እኛ ብሎ የተቀበለውን መከራ በማሰብ በፍፁም ሀዘን ውስጥ ስለሆንን ነው።

2ኛ/ ይቺ ሰሞነ ህማማት ወይም የህማማት ሳምንት የምትባለው የኦሪቱን ስርዓት የምናስታውስበት ስለሆነ በኦሪቱ ስርዓት ደግሞ በአዲስ ኪዳን የሚፈፀሙ ሚስጢራት ስለማይፈፀሙ ያንን በማስታወስ ነው።

3ኛ/ ከክርስቶስ መምጣት በፊት አዳም እና ልጆቹ በመከራ እና በስቃይ ያሳለፉትን የ5500 ውን የጨለማ ዘመን ወይም አመተ ኩነኔ የተባለውን ዘመን ለማስታወስ ስለሆነ በእነዚህና በሌሎቹ ዋና ዋና ምክንያቶች በህማማት ሳምንት ብዙ የማይፈፀሙ ስርዓቶች ስላሉ ጠያቂያችንም ሆኑ ሁሉም አባላቶቻችን ለጥያቄው የሚሆን ይህንን አጭር መልዕክት የሰጠንበት ሲሆን ነገር ግን በፊታችን የጾም መጨረሻ ላይ ፥ እግዚአብሔር አምላካችን እዚያው ያድርሰንና በስፋት ትምህርት የምናስተላልፍበት ስለሚሆን ተከታተሉ።