ስለ ንስሐ ጥያቄና መልስ ቁ.2

ጠያቂያችን፤ በመሰረቱ የድፍረት ኅጢአት የሚለው አገላለፅዎ ሃሳብን በግልፅ ለማብራራት አያስችልም። ይሁን እንጂ ኅጢአት ሁሉ የድፍረት ጥፋት ነው። ማንኛውም ክርስቲያን የሃይማኖትና የምግባር ጉድለት ሲያጋጥመው በአንፃሩ ኅጢአት ወደመስራት ዝንባሌ ውስጥ ይገባል። የኅጢአት መነሻው ምኞት ነው፤ ምኞት ወደ ተግባር ሲቀየር ኅጢአት ይሆናል፤ የኅጢአት ደግሞ መጨረሻው የዘለዓለም ሞት ነው። ስለዚህ ከእግዚአብሔር ጋር የሚያጣላንን ቀርቶ ከሰው እና ከማህበረሰቡ ጋርም አብሮ የማያኖረውን እና ፍቅር የሚያሳጣውን ድፍረት መፈፀም የለብንም። መቼም ስለምንሰራው ማንኛውንም ኅጢአት ስንፈፅም በተለምዶ አነጋገር ሰይጣን አሳስቶኝ ነው ብንልም እንኳን፤ ይሄን አታድርግ ተብሎ በእግዚአብሔር የተደነገገውን ትዕዛዝ ተላልፎ የሚፈፅመው ኅጢአት መሆኑን ሳያውቅ ቀርቶ ሳይሆን እያወቀና እየተገነዘበ ለግዜውም ቢሆን ለራሱ ምክንያት በመስጠት ኅጢአቱን በመስራት የሚያገኘውን ጥቅም በማሰብና በመቁጠር በድፍረት የሚፈፅመው ነው።

ስለዚህ ጠያቂችን ሁል ግዜ በነፍሳችን ጉዳይ ላይ እራሳችን በምንፈጥረው የጥፋት ምክንያቶችን በመደርደራችን ከእግዚአብሔር ዘንድ ከተጠያቂነት ነፃ ስለማያደርገን ወደፊት ኅጢአትን በድፍረት ላለመስራት ማድረግ ያለብን፦

1ኛ እግዚአብሔርን በመፍራት መኖር፣

2ኛ  በካህናት አባቶቻችን ትምህርት እና ምክር መኖር፣

3ኛ  ዘወትር ወደ እግዚአብሔር ቤት ሄደን ከክፉ ነገር እንዲጠብቀን መማፀን፣

4ኛ ስንወጣም ስንገባም በየእለት ተግባራችን የእግዚአብሔር ጠብቆት እንዳይለየን በትዕግስትና በማስተዋል በክርስቲያናዊ ስነምግባር በፆም በፀሎት ተወስነን መኖር ያስፈልጋል።

በተጨማሪም ከዚህ በፊት በንስኀ  ዙርያ ለተላኩልን ጥያቄዎች ያስተላለፍናቸውን መልእክቶች ከድረገጻችን በመመልከት ተጨማሪ ትምህርት  እንዲያገኙበት ይህን ሊንክ ልከንልዎታል።

https://yohannesneseha.org/ጥያቄና-መልስ/

መልስ፦ ጠያቂያችን ኀጢአት አጥብቆ መፀየፍና መጥላት ክርስቲያናዊ ህይወት ነው። ይሁን እንጂ ኀጢአትን አጥብቀን ከመጥላት የተነሳ ደግሞ ኀጢአት እንዳንሰራ በሞት ለመቅደም መመኘት እና መወሰን ይህም ቢሆን እራሱን የቻለ ደካማ የሆነ የሥጋ ሀሳብ ነው። 

እግዚአብሔር እኛን በኀጢአት እንድንኖር የማይፈቅድ አምላክ ስለሆነ በዚሁ በለበስነው ደካማ ሥጋ ዘወትር እየተፈተንን በኀጢአት የምንወድቅበት ፈተና ቢበዛም እንኳን ከወደቅንበት የኀጢአት ወጥመድ ውስጥ በንስኀ ህይወት ለመነሳት መንፈሳዊ ተጋድሎ ማድረግ ክርስቲያናዊ ህይወት ነው። 

ስለዚህ ጠያቂያችን የዚህን አለም ጥፋት እና ተቆጥሮ የማያልቀውን ኀጢአት ስንመለከት በእርግጥም በሃይማኖትና በምግባር ፀንቶ ለሚኖር ክርስቲያን ያለውን መንፈሳዊ ህይወት ከሚያጣ ይልቅ ሞትን መምረጥ ሊያስመኝ ይችላል። ነገር ግን በሞት ኀጢአትን መለየት ስለማይቻል ከምንም በላይ ትጥቃችን እና ፀጋችን ይበዛልን ዘንድ በዚሁ ኀጥያትና ፅድቅ በተቀላቀሉበት ዓለም ውስጥ ፅድን ከኀጢአት፣ ህይወትን ከሞት፣ ብርሃንን ከጨለማ ለመለየት በኀጢአተኛው ዓለም ውስጥ መንፈሳዊ ሆነን ለመኖር የምናደርገው የዘወትር ተጋድሎ የእዚአብሔርን ክብር ስለሚያበዛልን እርስዎም እግዚአብሔር የልብዎትን መልካም ምኞትና ስለሚያልፈው ዓለም ያለወትን መልካም ምኞት እግዚአብሔር ስለሚያውቀው የእርሱ ቸርነት ስለማይለይዎት ሳይጨናነቁና በፀሎትና በሃይማኖትና በምግባር ፀንተው ህይወትዎትን እንዲያስቀጥሉ ይህን አጭር ምክር እንዲደርስዎት አድርገናል። 

ለተጨማሪ ምክርና ትምህርት በውስጥ መስመር በሚደርስዎ ስልክ ደውለው ሊያነጋግሩን ይችላሉ።

ጠያቂያችን ግለሰባዊ ወሲብ ወይም ከራስ ጋር የዝሙት ሃሳብ መፈፀም ከፍተኛ የኅጢአት አይነት እንደሆነ ከዚህ በፊት በቀረቡልን ጥያቄዎች መነሻነት አስታውቀናል። ይሁን እንጂ በየጊዜው በሚያጋጥም ፈተና የተቸገሩ አባላቶቻችን በእኛ በኩል የመፍትሄ ሃሳብ እንድንሰጣቸው ጥያቄ የማቅረባቸው ሁኔታ እጅግ ተገቢ ነው። ምክንያቱም እንኳንስ በሃይማኖት ጉዳይ ይቅርና በሥጋ ጉዳዮቻችን እንኳን ስንቸገር ለሚመለከተው የሃሳባችን ተጋሪ ችግራችንን ግልፅ ካላደረግን መፍትሄ ማግኘት አንችልም። አንድ ታማሚ ሰው የህመሙን መፍትሄ እና ጠቅላላ ሁኔታ ለሀኪሙ በግልፅነት ማስረዳት ካልቻለ የጤና ባለሞያው ወይም ዶክተሩ በሰውየው ያለውን በሽታ በመሳሪያ የታገዘ ምርመራና የመድሀኒት ህክምና ለማድረግ አያስችለውም። 

ስለዚህ ወደ ጥያቄው ስንመለስ ይህ ግለሰባዊ ወሲብ ወይም ደግሞ ከራስ ጋር ዝሙት መፈፀም የሚለው ሃሳብ ሲጀመር ሥነተፈጥሮን የሚዋጋ ወይም ከተፈጥሮ ስርዓት ውጭ የሆነ በሰይጣናዊ መንፈስ አነሳሽነት የሰው ልጅ የሚወድቅበት የኅጢአት አይነት ወይም በመፅሐፍ ቅዱስ እንደተገለፀው የዚህ አይነት ኅጢአት ግብረሰዶማዊነት ይባላል። በዚህ አይነት ፈተና ያለ ሰው የራሳችን ተፈጥሮ በማይፈቅደው ነገርና የራሳችን አይምሮ ስለሚቃወመን ኅጢአቱን በመፈፀም ከተላለፍነው ጥፋት ይልቅ ጠያቂያችን እንዳሉት ስነ አይምሯችን የመንፈስ እረፍት ያጣል፤ የተረጋጋ መንፈስም አይኖረንም። በዚህን ጊዜ የሰው ልጅ ተስፋ ቆርጦ ወደ በለጠ ኅጢአትና የጥፋት ጉድጓድ ውስጥ እንድንገባ እርኩስ መንፈስ ችግሩን እያባባሰ ወደ ንስኅ ህይወት እንዳንመለስ ያደርገናል። 

ስለዚህ የኅጢአት አይነት በመፅሐፍ ቅዱስ አስተምሮ መሰረት በቅርብ ቀን ሰፋ ያለ ትምህርት የምናቀርብበት ሆኖ፤ ለግዜው ግን ጠያቂያችን በእርግጠኝነት ማመን ያለብዎት ምንም እንኳን በዚህ አይነት ኅጢአት ቢወድቁም  የእግዚአብሔር መንፈስ ፈፅሞ ስላልተለየዎትና እርስዎም ወደ ንስኅ ለመቅረብ  እየተፀፀቱ በመቅረብና ግልፅ ሆነው በኛም በኩል ምክር እንድንሰጥዎ ከፍተኛ ፍላጎት ያለዎት በመሆኑ ከዚህ ክፉ የኅጢአት ፈተና ውስጥ ለአንዴና ለመጨረሻ ጊዜ እንደሚለዩ አይጠራጠሩ። እርስዎ ማድረግ ያለብዎትን ምክር እንድንሰጥዎት በውስጥ መስመር በሚደርስዎት ቁጥር ደውለው እንዲያገኙን ሆኖ ከዚህ ክፉ ሃሳብ ጋር አብሮ ላለመኖር በፀሎትና የእግዚአብሔርን ስም በመጥራት ፣ ወደ ቤተክርስቲያን በመመላለስ፣ ስርዓተ ጥምቀት በመፈፀም ፣ በመስቀል በመዳበስ፣ በአጠቃላይ ባሉበትም ቦታ ሆነው የእግዚአብሔርን ስም እየጠሩ፣ በድንግል ማርያም ስም፣ በቅዱሳኑ እና በራሱ በባለቤቱ ስም ይህንን ክፉ መንፈስ ከኔ አርቅልኝ እያሉ ያለዎትን የመማፀን ፀሎት ማቅረቦትን እንዳያቋርጡ እንመክራለን። ከላይ እንደተገለፀው ኅጢአትን ለመተው እየፈለጉ እንዳይተውት የሚያደርግ መንፈስ እንዴት እንደሚታገልዎት በሽታው ረቂቅ መንፈስ ስለሆነ ከእርስዎ ጋር ስንመካከርና ምክር ስንሰጥዎት ሁሉም ነገር እየቀለለዎት ስለሚመጣ በውስጥ መስመር ያግኙን በማለት ይህ አጭር መልዕክት እንዲደርስዎ አድርገናል።

እስከዚያው ድረስ የእግዚአብሔር አጋዥነትና ጠባቂነት አይለይዎት

ጠያቂያችን ከዚህ ቀደም ስለ ሰዶማዊነት እና ተዛማጅ ጉዳዮች በሚመለከት ከፍተኛ የኅጢአት አይነት እንደሆነ መልእክት ማስተላለፉችንን እናስታውሳለን :: አሁንም ከራስም ጋር ሆነ የሰዶማዊነት መንፈስ ባለበት የዝሙት ኀጢአት ስራ ፤እንኳን ክህነት ሊኖረው ቀርቶ በነፍሱም በኩል ከባድ የንስሃ ቀኖና ካልፈጸመ በስተቀር በፈጣሪው ዘንድ ያስጠይቀዋል :: በእርግጥ የሰው ልጅ ለኅጢአት ባይፈጠርም ለኀጢአት የሚሰማማ ስጋ ስለለበስ በዚሁ ደካማ ስጋው አስቦበትም ይሁን ሳያሰበው ሰይጣን ደካማ ጐኑን ወይም የሃሳብ ዝንባሌውን ፈልጎ በሰውየው ላይ በረቂቅ መንፈሱ አድሮ ስለሚዋጋ ሁሉም ሰው በተለያ የጥፋት መንገድ ሲስናከል ማየት የተለመደ ነገር ነው።ከጥቂት ፍፁማን በስተቀር ከትንሽ እስከ ትልቅ ድረስ ፣ከአዋቂ እስከ ህፃን ድረስ በተለያየ ጥፋት ውስጥ ሁሉም የተጠመደ ነው ::የሆነ ሆኖ ብዙ ሰዎች ኀጢአት ሰለሰሩ እና ብዙ ኀጢአት ስለተፈጸመ ፥ኀጢአትን ቀላል አያደርግም ወይም ደግሞ የእኔ ኀጢአት ከእከሌ ኀጢአት ያንሳል ወይም የእከሌ ኀጢአት ከእኔ ኀጢአት ይበልጣል በሚል የማሻሻያ ሃሳብ ሊወሰን የሚችል አይደለም ::ስለዚህ ጠያቂያችንም ሆኑ አባላቶቻችን ከኀጢአት ጋር በተያያዘ የሚኖረን አመለካከት ጥልቅና ቁርጠኝነት ሊኖረን ያስፈልጋል :: ይህ ማለት በ21ኛው መቶ ክፍለ ዘመን በቤተክርስቲያን ከውስጡ ክፍል ከካህናት እስከ ምእመናን ብዙ ያልተለመዱ እና የሚዘገንኑ የኀጢአት አይነቶች ማየት እየተለመደ ስለመጣ ይህ መጥፎ ልምድ ደግሞ ኀጢአትን እንድንለማመድና እንድንንቅ ወይም ቸላ እንድንል ሰይጣን በስውር ምስጢሩ ሁላችንንም የማደንዘዣ መርፌ የወጋን እስኪመስል በኀጢአት እንቅልፍ ውስጥ ያለን ሰዎች እጅግ ብዙ ነን።

ስለዚህ ካህንም ሆነ ምእመን በሰራው ኀጢአት ከክብሩ ይዋረዳል፤ በእግዚአብሔር ፀጋ የተሰጠው ክህነትም ሆነ መንፈሳዊ ሃይል ከሱ ይወስድበታል :: በንስሓ ሲመለስ ግን ለክህነታዊ አገልግሎት መብቃት ባይችልም የእግዚአብሔርን ሰማያዊ መንግስት ለመውረስ ግን ይታደላል።

ሁላችንም በዚህ ማስተዋል ውስጥ አንድንኖር አይና ህሊናችንን ያብራልን

ጠያቂያችን፤ መታወቅ ያለበት ኅጢአት እስካለ ድረስ ንስኅ ደግሞ የማይቋረጥ ሂደት ነው። ምክንያቱም ለኅጢአት ስርየት ለማግኘት ንስኅ የተባለውን የነፍስ መድኅኒት የሰጠን እራሱ ባለቤቱ መድኅኒአለም ኢየሱስ ክርስቶስ ነው። ቢቻል ማንኛውም ክርስቲያን ኅጢአት ላለመስራት አጥብቆ መጋደል አለበት። ይህ ማለት ፈቃደ ሥጋን ለፈቃደ ነፍስ ማስገዛት አለበት። እርኩስ መንፈስ ሰይጣን ዘወትር በኅጢአት እንድንወድቅ የሚያመጣብንን ፈተና ላለመቀበል በትጋትና በንቃት ቆመን የኅጠአት ምንጭ የሆኑትን ምክንያቶች ሁሉ በማስወገድና በመራቅ ፈቃደ ሥጋችንን አሸንፈን መኖር አለብን።

ይሁን እንጂ ጠያቂያችን እንዳሉት በዚህ ሁሉ ክርስቲያናዊ ህይወት ተወስነን እየኖርን በኅጢዓት ብንወድቅ የንስኅ ቀኖና ተቀብለን እስከ መጨረሻው ድረስ የተሰጠንን የንስኅ ህይወት እንደ ቤተክርስቲያን ስርዓታችን ልናከናውን ሲገባን በመካከል የተሰጠንንም ንስኅ ሳንጨርስ ደግሞ ሌላ ሌላም ተጨማሪ ጥፋት ብንፈፅም፤ ቀኖና ተቀብለን ስላልጨረስነውም ሆነ በተጨማሪ ያጠፋነው ጥፋት ካለ ስለ ስርዓተ ቀኖና ወይም ስለ አንቀፀ ንስኅ ጠንቅቀው ወደሚያውቁ አባቶች ቀርበን በመናዘዝ እንደገና ንስኅ ልንገባ ያስፈልጋል።

በተደጋጋሚ እንዳየነውና እንደተረዳነው ከሆነ የብዙ ሰዎች ችግር 1ኛ በየጊዜው በሚያጋጥሟቸው ጥፋት በየጊዜው ወደ ንስኅ አባታቸው ሄደው ለመናዘዝ መሳቀቅ ወይም የፍርሃት መንፈስ ይታይባቸዋል። በ2ኛም ወይም አንድም ጥፋት በሰሩ ቁጥር ወደ ንስኅ አባት በየጊዜው እየሄዱ ንስኅ የመግባት ጉዳይ ምስጢራችን ይባክናል ብለው የማሰብ ሁኔታም እንደሚያጋጥማቸው በተደጋጋሚ ተገንዝበናል። ስለዚህ እንዲህ አይነት ችግር ያጋጠማችሁ የፕሮግራማችን አባላት ብትኖሩ በውስጥ መስመራችን እያገኛችሁን በእኛ በኩል በበጎ ፈቃደኝነት በሚያገለግሉ የቤተክርስቲያን አባቶች ማንኛውንም ንስኅ መናዘዝ እንድትችሉ የመፍትሄ አቅጣጫ መንገድ የምታገኙበትን መንገድ የምንሰጣችሁ መሆኑን ከወዲሁ ለመግለፅ እንወዳለን።

.ተተጨማሪ ምላሽ

የተሰጠዎትን ቀኖና በፀጋና በክርስቲያናዊ መታዘዝ ሆነው ከፈፀሙ በኋላ የሚቀጥለውን የንስኀ ህይወት የነፍስ አባትዎ ጋር ቀርበው የፈፀሙትን የንስኀ ጊዜ ቀኖና በማስረዳት በቀጣይ መናዘዝ የሚገባዎትን የንስኀ ፀፀት በማስረዳት ቀጣዩን ቀኖና መቀበል ይችላሉ። ምክንያቱም መቼም ጊዜ ለንስኀ በተዘጋጀን ቁጥር በሥጋም ሆነ በነፍስ በረከታችን እና ሰማያዊ ክብራችንን ስለሚያበዛው የምንጠቀምበት እንጂ የምንጎዳበት ህይወት ስለማይሆን፤  በአጠቃላይ ንስኀ ማድረግ  ለብዙ ነገር ጠቃሚ ነውና በዚህ አይነት ስርዓት እንዲፈፅሙ ይህን አጭር መልዕክት ልከንልዎታል።

ጠያቂያችን ፤ ሰው በልቡ ወይም በሀሳቡ ስለሚያስበው ነገር ቢቆጠር የሰው ልጅ ከሚኖረው እድሜ እና በዘመኑ ከሚሰበስበው ገንዘብ ቁጥር በላይ ይሆናል ማለት ይቻላል። ያሰብነውንና የተመኘነውን ሁሉ እንደ ኅጢአት ቆጥሮብን ብንጠየቅበት እንኳንስ ንስኅ ገብተን እዳ በደላችንን ማካካስ ቀርቶ የአሰብነውን እንኳን ብንጠየቅ በቃል ለማስረዳት ከምናስታውሰው ይልቅ የማናስታውሰው ሃሳብና ምኞታችን ይበዛል። ከዚህ በፊትም በተለያዩ ጥያቄዎች  ብዙ ጊዜ ደጋግመን እንዳመለከትነው ሁሉ የሱን ቸርነትና የሱን ይቅር ባይነት አስበን ካልሆነ በስተቀር እኛ በማሰብ በመናገር እና በመስራትም ስለምንሰራው ኅጢአት ሁሉ በጥፋታችን መጠን እግዚአብሔር ፍርዱን ቢያፀና በህይወታችን እንኳን ሳይቀር ልንክሰው የሚቻለን አይደለም። ስለዚህ ጠያቂያችን ከደቂቃ በሚያንስ ጊዜ ውስጥ ባለን ቦታ ላይ የማይገባንን ብቻ ሳይሆን ፈፅሞ በገሀዱ ዓለም ውስጥ የማይቻለውን ነገር እንደ ምኞትና እንደ ሃሳብ ልንመኝ እንችላለን። በዚሁ ሁሉ ነገር ላይ ንስኅ ለመግባት ወይም ኅጢአት ነው ብለን ለመቁጠር የማይቻል ስለሆነ ያሰቡት የእስላምም ሆነ የክርስቲያን ልጅ ሰው ሆነን በመፈጠራችን የምናይበት ዓይን ፣ የምንሰማበት ጆሮ፣ የምናስተውልበት አይምሮ እና የተፈጥሮ ስሜታዊ አካል እስካለን ድረስ እንዲህ አይነት ነገሮች ወድያው በሃሳብ ሊፈትኑን የሚችሉና የማይቋረጥ ሂደት ስለሆነ በዚህ ጉዳይ ማሰብና መጨነቅ አስፈላጊ አይደለም። ነገር ግን ኅጢአትን አስበንና አቅደን በተግባር ላይ ልናውለው ያሰብነው ከሆነ ወይም ከዋናው አላማችን የሚያስወጣ ከተግባር ያልተናነሰ ጥፋት ሆኖ ከተገኘ ንስኅ ሊያስገባን ይችላል፤ እንጂ በአጋጣሚ ባየነውና በተመኘነው ነገር ላይ አስፈላጊ እንዳልሆነ ከተረዳንና ከአላማችን እስካልወጣን ድረስ ውስጣችንም ስለሚፀፀትበት ወደ ልባችን ተመልሰን የህሊና ንስኅ ስለምንገባበት ወይም እንደንስሃ ፀፀት ስለሚቆጠር እንዲህ አይነት ነገሮችን አካብደን ማየት እንደሌለብን ይህን አጭር መልዕክት ልከንልዎታል። 

 ጠያቂያችን ወደ ቤተክርስቲያን ለመሄድ የማይችሉበት በቂ የሆነ ምክን ያት ካጋጠመዎ በቤትዎ ግቢ ራሱን የቻለ ቦታ ለይተው በፊትዎት የቅዱሳት ስዕልን ወይም ቅዱስ መፅሐፍ ወይም ቅዱስ መስቀሉን በማድረግ መስገድ ይችላሉ። ምክንያቱም ከምንም በላይ የኛን ችግር እግዚአብሔር ስለሚያውቀው ነው። ነገር ግን ወደ ቤተክርስቲያን ሄደን መፀለይና መስገድ እየቻልን በስንፍና ብቻ ያለበቂ ምክንያት ሄደን የማንሰግድ ከሆነ የቤተክርስቲያን ቀኖና ስለማይፈቅድ እና በንስኅ የምናጠናቅረውን ቀኖናም ከንቱ ስለሚያደርግብን መጠንቀቅ ያስፈልገናል። ወደ ቤተክርስቲያን በሄድን ቁጥር እግዚአብሔርን አግኝተን እንዳነጋገርነውና በእኛ ህይወት ላይም ሰይጣን ዘወትር የሚዘረጋውን የፈተና ወጥመድ  በጣጥሰን ለመጣል የሚያስችለን መንፈሳዊ ኃይል የምናገኝበት መንገድ ስለሆነ የሰው ልጅ ይሄንን ለማድረግ የማይችለው ከባድ የጤና ወይም የስራ ፈተና ካላጋጠመው ነው።ስለዚህ ጠያቂያችን ወደ ቤተከርስቲያን ሄዶ ቀኖናን መፈፀሙ እጅግ ተመራጭ እንደሆነ እንመክራለን።

ጠያቂያችን የግል ወሲብ ወይም ከራስ ጋር የዝሙት ሃሳብ መፈፀም ወደ ሰው የሚመጣው ግብሩን እንድንፈፅም የሰይጣን እጅ ቢኖርበትም እንኳን ነገርግን የሰው ልጅ በለበሰው ደካማ ሥጋ በዝሙት ምኞት ተቃጥሎና ራሱን መግዛት አቅቶት በፈቃደኘነት የፈጠረው እንጂ ሰይጣን እጁን አስሮ አንገቱን አንቆ ያስፈፀመው ኅጢአት አይደለም። ምክንያቱም እኛ ራሳችን በነፃነት ስለተፈጠርን ወደን ኀጢአት መስራት ወይም ወደን ፅድቅ መስራት የምንችልበት ተፈጥሯዊ እውቀት አለን። ይቺ ለኛ የተሰጠችን ነፍስ አዋቂ ስለሆነች ጽድቅ እና ኩነኔን፣ ህይወት እና ሞትን፣ ብርሃን እና ጨለማን፣ ገነት እና ሲኦልን፣ ታቦት እና ጣኦትን፣ መንግስተ ሰማያትን እና ገሃነመ እሳትን፣ እግዚአብሔርን እና ሰይጣንን (ቤልሆር) ለይተን ለማወቅ እና ለማስተዋል ታስችለናለች። ግብረ ዓኦና የሚፈፅም ሰው ኅጢአቱን መተው የማይችልበት ዋናው ምክንያት የሰይጣን ግፊት ቢኖርበትም እንኳን ኀጢአቱን እንደጥቅም ወስዶ ሥጋውን ማርኪያ አድርጎ ስለሚፈልገው ብቻ ነው። ባጠቃላይ መተው የማይችልበት ዋናው  ምክንያት የሱ የራሱ ተፅኖ ፈጣሪነት ብቻ ነው።  ስለዚህ፤ ጠያቂያችን አዎ መተው ይቻላል። እኛ ራሳችን ከዚህ ኅጢአት ነፃ ለመሆን በቁርጠኝነት ከተነሳን የሰይጣንን ፈተና እና የራሳችንን የሥጋ ምኞታችንን ሁሉ ማቋረጥ የሚያስችል መንፈሳዊ ፀጋ አለን። ስለዚህ ከዚህ ፈተና እንዴት መላቀቅ እንደምንችል ከዚህ በፊትም በተደጋጋሚ እንደገለፅነው መፆም፣ መፀለይ፣ መስገድ፣ አባቶችን በማነጋገር ንስኅ መግባት፣ መጠመቅ ወደ ቤተክርስቲያን እየሄዱ እግዚአብሔርን ዘወትር መማፀን፣ በእመቤታችን እና በቅዱሳን  ስም ከዚህ ኅጢአት ለመላቀቅ ቃል ኪዳን መግባት ፣ ሁሌ ከዚህ ክፉ ሃሳብ መለየት እንዲችሉ ይህ የኀጢአት ሃሳብ ወደ እርስዎ እየመጣ በተዋጋዎት ቁጥር ፀሎት ማድረግና የእግዚአብሔርን ስም የእናታችንን የድንግል ማርያምን ስም የቅዱሳን መላዕክትን ስምና የቅዱሳን ፃድቃን ሰማእታትን ስም በመጥራት ወድያውኑ ሰይጣን አይምሮዎት ላይ የፈጠረውን ክፉ ምኞት ለመቃወም ከእርስዎ ማራቅ መቻል አለብዎት። እነዚህን የሚመሳስሉ መንፈሳዊ ተግባራትን የምናከናውን ከሆነ እርኩስ መንፈስ ከኛ ለቆ (ተለይቶ) ስለሚሄድ ያኔ ይሄን ኅጢአት ልንጠየፈው እንደምንችል አይጠራጠሩ። ስለዚህ ጠያቂያችን ይህን ተረድተው መልዕክታችንን በስራ ላይ እንዲያውሉ እየመከርን፤ ተከታታይ የሆነ ምክር እና ትምህርት ካስፈለገዎ በውስጥ መስመር ሊያገኙን ይችላሉ።

 ህልመ ሌሊት በህልም መልክ ወደ ሰው ልጅ የሚመጣ መንፈሳዊ ውግያ ስለሆነ በጊዜውም ያለጊዜውም ጠላታችን ዲያብሎስ እኛን በኅጢአት ጠልፎ ለመጣል የማይቆፍረው ጉድጓድ የለውምና እንኳን በህልም ቀርቶ በገሀድም ቢመጣ ጠላት ያው ጠላት ስለሆነ፤ ከጠላት ደግሞ መልካም ነገር ስለማይጠበቅ በተለይም በመንፈሳዊ ህይወታችን ስንኖር በረቂቅ ምስጢር የሚወጋንን ሰይጣን ታግለን ድል መንሳት የምንችለው ዘወትር በፀሎት፣ በፆም እና በስግደት ተወስነን በምንከፍለው ክርስቲያናዊ ተጋድሎ ነው። 

እንግዲህ ጠያቂያችን እንዳሉት በህልመ ሌሊት የዝሙት ሀሳብ ይዞ የሚታገለን ክፉ መንፈስ ዋና መነሻው የእኛን ደካማ ሃሳበችንን፣ የአመለካከት ዝንባሌያችንን፣ ወይም ምኞታችንን ምክንያት በማድረግ ስለሆነ ሁሌ የሚታገለንን የኅጢአት ሃሳብ ከእኛ አውጥተን ለመጣል እንችል ዘንድ ፦

1ኛ/ የማይቋረጥ ቋሚ የፀሎት ፕሮግራም ሊኖረን ይገባል።

በ2ኛ/ ደረጃ ስለ ሃይማኖታችን የሚመክሩንን የሚያስተምሩንን ሃይማኖታዊ ስርዓት በተግባር መፈፀም አለብን።

በ3ኛ/ ደረጃ በፀበሉ ፣ በቅዱስ መስቀሉና፣ በእምነቱ ከአጋንንት ውጊያ ለመዳን እንደምንችል ተረድተን አስፈላገውን አገልግሎት ማግኘት አለብን።

4ኛ/ በህልመ ሌሊት የሚመጣው የሰይጣን ውግያ በኛ የግል ህይወት አንፃር በምን ምክንያት እንደሚዋጋን በከታታይ ከሚያጋጥመን ፈተና አንፃር መንስኤውን ለይተን ማወቅና ይሄንኑ ያጋጠመንን ፈተና ለመንፈሳዊ አባታችን ወይም ንስኅ አባታችን በግልጽ በማስረዳት አስፈላጊውን ምክርና መንፈሳዊ አገልግሎት ማግኘት አለብን።

በአጠቃላይ እነዚህን ምክረ ሃሳቦች በስራ ላይ እንዲያውሏቸው እየመከርን ተጨማሪ ምክርና ማብራሪያ ካስፈለገ በውስጥ መስመር ሊያገኙን እንደሚችሉ እንገልፃለን።

 ጠያቂያችን፤ በእርስዎ በኩል የቀረበው ጥያቄ ከዚህ በፊትም እንደገለፅነው ከራስ ጋር የዝሙት ሃሳብ ለመፈፀም ተነሳስተው በሃሳብና በምኞት ራሳቸውን በሰይጣናዊ ስራ ተገዚ የማድረጉ ተግባር ብዙ ወገኖቻችን እየተፈተኑበት ያለ ጉዳይ ነው። ማንኛውም ሰው በራሱ ፈቃድ እሚጎዳውን ለማድረግ የሚስማማ እንዳልሆነ ይታወቃል። ምክንያቱም ከህይወት ይልቅ ሞትን፣ ከፅድቅ ይልቅ ኅጢአትን ወይም ኩነኔን የሚመርጥ ሰው አይኖርምና። ስለዚህ በእርስዎም በኩል የቀረበልን ጥያቄ በዘመናችን ወቅታዊ የሆነ ብዙ ሰዎችን እየተዋጋ ያለው ኅጢአት አይነት አለምንም ሁሉ አንድ ለማድረግ በምድር ላይ ሰልጥኖ በከፍተኛ ደረጃ የሰውን ልጅ ሁሉ ወደ አንድ አቅጣጫ ለማምጣት እየታገለ ያለበት ከተፈጥሮአዊ ስርአት ውጭ የሆነ ከፍተኛ የኅጢአት አይነት ወይም ደግሞ ግብረሰዶማዊነት እንደሆነ መዘንጋት የለበትም። ይህ ደግሞ ከዚህ በፊትም እንደገለፅነው ከኅጢአት ሁሉ የከፋ ከባድ ውድቀት እንደሆነ በቅዱስ መፅሐፍም አስተምሮ አለምን ለጥፋት ያበቃ የኅጢአት አይነት እንደሆነ መረዳት አለብን። ይሁን እንጂ ብዙዎች የሚፈተኑበት ሴጣናዊ ሃሳብ ቢሆንም እንኳን የታመመ ሁሉ እንደማይሞት ኅጢአተኛ ሁሉ እንደማይኮነን የወደቀ ሁሉ እንደማይሰበር ሁሉ ፥ ምንም እንኳን በዚህ የኅጢአት አይነት መውደቅ  ከባድ ፈተና እንደሆነ ቢታወቅም እንኳን ልክ እንደ እርስዎ አይነት የንስኅን ፀሎት የሚሰማው፤ ክርስቲያን በነፍሱ ላይ ያጋጠውን የኅጢአት እድፍ በንስኅ ህይወት ታጥቦ ለመፅዳት እስከተዘጋጀ ድረስ ስለወዳጆቹ ወይም ስለልጆቹ አንድ ቀንም ያማይጨክነው…… የርህራሄና የምህረት አምላክ እግዚአብሔር በደላችንን ሁሉ ዘወትር ይቅር ማለት የተለመደ የባህሪ ሥራው ስለሆነ እርስዎም በዚህ አይነት አቀራረብ ስለፈፀሙት የኅጢአት ስራ በመፀፀት ለንስኅ የተዘጋጀ ህሊና ስላለዎት በእርግጠኝነት በዚህ አይነት ፈተና የሚቃወምዎትን ጠላት እንደሚያሸንፉት አይጠራጠሩ።     

በእርስዎም በኩል እንደገለፁት ሁሉ ፈተናውን ለመቋቋም እያደረጉት ያለው መንፈሳዊ ተጋድሎ እጅግ መልካም ነው። የንስኅ አባትዎ ይህንን ፈተና በንስኅ ህይወትና መንፈሳዊ ተጋድሎ ለማስወገድ ቀርበው ባስረዷቸውጊዜ ነገሩን እንደቀላል ቆጥረውት ከሆነ እንዲህ አይነት ሃላፊነት የጎደለው አባትነት ለጠላት ዲያብሎስ አሳልፎ የሚሰጥ ስለሆነ ያለምንም ቅድመ ሁኔታ ትጉህና ለመንፈሳዊ ልጆቹ (ለመንጋው ጥበቃ) የማያንቀላፋና ዘወትር ቁጥጥር እና ክትትል የሚያደርግ አባት መያዝ እንደሚባዎት እንመክራለን። 

በሁለተኛ ደረጃ  ከዚህ ከገቡበት ፈተና ለመውጣት  ይችሉ ዘንድ እርስዎ ከዘረዘሯቸው በተጨማሪ  ፦

1ኛ/  እርስዎ እንደገለጹት ዘወትር ሳያቋርጡ የሚፀልዩት የግል ፀሎት መኖር አለበት። ምን መፀለይ እንዳለብዎት እኛንም በውስጥ መስመር ቢያነጋግሩን ልንመክርዎት እንችላለን።

2ኛ/  ምንም እንኳን በግል ህይወትዎ ወይም በስራ አጋጣሚ ወይም በቤተሰብ ሁኔታ ጊዜ ባይኖርዎትም፥ እንደምንም ታግለውም ቢሆን እንኳን ለ አንድ ሱባኤ የተለየ የንስኅ ፕሮግራም ይዘው እየተጠመቁና ልዩ ልዩ መንፈሳዊ አገልግሎት እያገኙ ቢቆዩ

3ኛ/ ይሄንን ፈተና ፈፅሞ መተው ይችሉ ዘንድ ተከታታይ መንፈሳዊ ትምህርት እና ምክር እንድንሰጥዎ አሁንም በውስጥ መስመር እያገኙን ቢከታተሉ፤

4ኛ ሁሌ ከዚህ ክፉ ሃሳብ መለየት እንዲችሉ ይህ የኅጢአት ሃሳብ ወደ እርስዎ እየመጣ በተዋጋዎት ቁጥር የእግዚአብሔርን ስም፣ የእናታችንን የድንግል ማርያምን ስም፣ የቅዱሳን መላዕክትን ስም እና የቅዱሳን ፃድቃን ሰማእታትን ስም በመጥራት ወዲያውኑ ሰይጣን በአይምሮዎት ላይ የፈጠረውን ክፉ ምኞት ለመቃወምና ከእርስዎ ለማራቅ መቻል አለብዎት።

በአጠቃላይ በዚህ ዓለም ውስጥ በክርስትና መታመን ውስጥ ስንኖር ውግያው ከሥጋዊና ከደማዊ ጠላት ጋር ሳይሆን ረቂቅ ከሆነው ከሰይጣን ጋር ስለሆነ በተለያዩ ረቂቅ ስልት የመታገሉ ሁኔታ ከዚህ ዓለም እስከምንለይ የሚቀጥል ስለሆነ በንስኅ በመፀፀት እርኩስ መንፈስ ጋር እየታገሉ ሳይሸንፉና ሳይማረኩ መኖር ፀጋና ክብር ስለሚያሰጥ ጠየቃያችን በዚህ አንፃር ንስኅ ገብተው ዳግም በኅጢአቱ ወድቀው እግዚአብሔርን ለላለማሳዘን አጥብቀው ፈጣሪን በፀሎት በመጠየቅ ህይወትዎን እንደመመሩ ተስፋ በማድረግ መንፈሳዊ ህይወትዎንም ይበልጥ በማጠናከር ተስፋ ሳይቆርጡ ይቀጥሉ ዘንድ ይሄንን ትምህርታዊ መልዕክት እንዲደርስዎ አድርገናል። ከላይ እንደገለፅነው ለ መንፈሳዊ አባትነት ትምህርት እና ተጨማሪ ማብራሪያ በውስጥ መስመር በላክንልዎ ስልክ ደውለው ሊያገኙን ይችላሉ።

መልስ፦ ጠያቂያችን ፤ ስለሰጠነዎት መልስ አመስግነው ወደፊት በፀሎት እንድናስብዎ የላኩት ማሳሰብያ ደርሶናል። እርስዎም በላክንልዎት መንፈሳዊ ምክር ተጠቃሚ በመሆኖት እኛም ደስ ብሎናል። በመንፈሳዊ ህይወትዎ ከዚህም በላይ እንድናገለግልዎ እንዳሉትም ወደፊት ለጥያቄዎ መልስ እና መንፈሳዊ ምክር አገልግሎት በሚያስፈልግዎት ጊዜ ሊያገኙን እንደሚችሉ እንገልፃለን። በጸሎት እግዚአብሔር ቢረዳን እንድናስብዎ የክርስትና ስምዎን በውስጥ መስመር ይላኩልን።

ማንኛውም የኦርቶዶክስ ተዋሕዶ ሃይማኖት ተከታይ (አማኝ) የሆነ ክርስቲያን ለአካለ መጠን ከደረሰበት ግዜ ጀምሮ የንስሐ አባት መያዝ ክርስትያናዊ ግዴታው እንደሆነ በቤተክርስቲያን የቀኖና መጽሐፍ ተደንግጓል። ይሁን እንጂ ኢትዮጵያውያን የኦርቶዶክስ ተዋሕዶ ሃይማኖት ምእመናን ኑሮዋቸውን ለማሸነፍና የተሻለ ኑሮ ለመፈለግ ሲሉ ጠያቂያችን እንዳሉትም ቤተክርስቲያንና ካህናት አባቶች ወደማይገኙበት ክፍለ ዓለም እና አካባቢ በልዩ ልዩ ምክንያት ተበትነው እንደሚኖሩ ይታወቃል። ሌላው ቀርቶ በኢትዮጵያ አገራችን ሳይቀር በረሃማና ጠረፋማ በሆነ አካባቢ እንዲሁም አህዛብ በሚበዙበት ቦታ የሚኖሩ ክርስቲያኖች በመከራና በፈተና ግዜ የሚያጽናናቸውና የሚመክራቸው አባት ሊያገኙ አይችሉም። የሚጸልዩበት እና ፈጣሪያቸውን የሚማፀኑበት ቤተክርስትያንም አያገኙም።

ስለዚህ በቅዱስ መጽሐፍ የእግዚአብሔር ቃል እንደሚነግረን ሰውን በነፍስ የማዳን ሥራ ከምንም በላይ ቅድሚያ የሚሰጠው ተግባር ነው። 

ስለዚህ ቤተክርስቲያንና አባቶች ካህናት በቅርብ የማይገኙበት ክፍለ ዓለም ወይም አካበቢ የሚኖሩ የንስሐ አባት ለመያዝ ቢፈልጉ ከምንም በላይ እግዚአብሔር የኛን የውስጥ ችግር ያውቀዋልና አንድ ኦርቶዶክሳዊ ክርስቲያን ያለ ንስሐ አባት አንድ ቀንም መኖር ስለሌለበት የንስሐ አባት እንዲኖረው በሃይማኖቱና በመንፈሳዊ ህይወቱ የመረጠውን ካህን የቦታ እርቀት ሳይገድበው መያዝ ይችላል። ካለው ችግር አንፃርም በስልክ እና በሌላ መልእክት በመገናኘት መንፈሳዊ ትምህርት እና ከንስሐ አባት የሚሰጠውን የንስሃ ቀኖና  መቀበል ይችላል። ማንኛውንም በጎ ስራ ሁሉ አባቱ የሚመክሩትን እና የሚያዙትን ሁሉ በመፈፀም የእግዚአብሔርን መንግስት ለመውረስ ስለሚችል የግድ በአካል ካላገኘኋቸው አብሬ በአንድ አጥቢያ ካልኖርኩኝ የንስሐ አባት መያዝ አልችልም በሚል ምክንያት ያለጠባቂ መኖር የለበትም። 

ከዚህ በፊት በተደጋጋሚ ስለ ንስኀ ህይወት አስፈላጊነትና ንስኀ ለመግባት የንስኀ አባት ሊኖረን እንደሚገባን እና በቦታ ርቀት የንስኀ አባት ካህን ብናጣ እንኳን አባቶችን ባሉበት ቦታ መርጠን በመያዝ በስልክም ሆነ ወይም በጽሑፍ መልዕክት ብቻ ለመገናኘት ለእኛ አመቺና የተሻለ በሆነ መስመር ተጠቅመን ከንስኀ አባታችን የሃይማኖትና የሥነ ምግባር ትምህርት ማግኘት፣ ንስኀ መግባት፣ ልዩ ልዩ የትሩፋት ሥራ መስራት ፣ በአጠቃላይ በሃይማኖትና በሥነ ምግባር ፀንተን ለመኖር እንደምንችል በስፋት መልዕክት እንዳስተላለፍን እናስታውሳለን።

በተጨማሪም ይህን በሚመለከት ከዚህ በፊት ስለ ንስሐ አባት አያያዝ ጥያቄ ቀርቦ በአባቶች ሊቃነ ጳጳሳት እና በቤተክርስትያን መምህራን ንስሐ አባት በርቀት መያዝ እንደሚቻል በተደጋጋሚ ምላሽ የተሰጠበት ሃሳብ ስለሆነ ፤ ጌታችን ኢየሱስ ክርስቶስ ለቅዱሳን ሐዋርያት እንዲያሥሩና እንዲፈቱ የሰጣቸው ስልጣነ ክህነት ጊዜና የቦታ ርቀት የማይወስነው ስለሆነ ፤ በአካባቢው አባት የሚሆን ካህን ከጠፋ ያለጠባቂ ብንኖር ጠላታችን ዲያብሎስ ነፍሳችንን እንዳይነጥቃት የንስሐ አባት በርቀት መያዝ ይችላሉ። በመሆኑም በዚህ ጉዳይ ላይ ምእመናን መጨናነቅ እንደማያስፈልጋችሁ መንፈሳዊ ምክራችንን እንለግሳለን።

በመሆኑም ጠያቂያችን ንስኀ አባት አሁን ባሉበት አገር ወይም አካባቢ ከሚገኙት ኢትዮጵያ ኦርቶዶክስ ቤተክርስቲያን ካህናት ካሉ መርጠውና አጥንተው  የንስኀ አባት በማድረግ መያዝ ይችላሉ። እንዳሉትም ይህን ለማድረግ የማይችሉበት ምክንያት ካለ ፤ አገር ቤት ካሉት አባት ጋር ተነጋግረው ወይም በቅርበት በሚያውቁት ሰው በኩል የተመሰከረላቸውን  እውነተኛ እና ለህይወታችን መድኃኒት ሊሰጡ የሚችልሉ አባትን አግኝቶ የዘላለም ሕይወት እንወርስ ዘንድ የሚያስችለንን የፅድቅ መንገድ እንዲመሩን የሚያድረጉ ትጉህ አባት ይዘው ከላይ እንደገለጽነው በስልክ ወይም በፅሁፍ መልዕክት ንስኀ መቀበል ይችላሉ።

ይህን ለማድረግ ካልቻሉ ደግሞ በዚህ ዮሐንስ ንስሓ ድረ ገፅ  ብዙዎችን በነፍስ እንዳይጠፋ ለማትረፍ እግዚአብሔር የፈቀደውን ያህል የበኩላችንን ጥረት እያደረግን መሆኑን በመረዳት ለአባትነት የመረጥናቸው የቤተክርስቲያን አባቶች በሃይማኖታቸውና በእውቀታቸው የታመነባቸው ስላሉ በውስጥ መስመር በላክንልዎት ስልክ ቁጥር ቢደውሉ  በእኛ በኩል የንስሓ አባት እንዲይዙ ልንረዳዎት እንችላለን።  ምክንያቱም የዚህ ድረገፅ ዋና አላማ የንስሓ ህይወትን ለማሳደግ የምክር እና የትምህርት አገልግሎት ከመስጠት ባለፈ በተለያየ የአለም ወጥመድ ውስጥ ያሉ ወገኖቻችንን በመንፈሳዊ ትምህርት በማነቃቃት በቅርብ ሆነው በጠዋት በማታ ምክር እና ተግሳፅ እየሰጡ የሚያገለግሉ አባቶች ጋር ማገናኘት ዋናው ቅድሚያ የምንሰጠው አገልግሎት በመሆኑ ነው።

ለሁሉም የእግዚአብሔር ፀጋና ፍቅር ባሉበት ቦታ ይብዛልዎት

ተጨማሪ መንፈሳዊ ምክርና ትምህርት ድረገጻችን https://yohannesneseha.org/ ላይ ያገኛሉ

ጠያቂያችን፤ ከጥያቄዎ ሃሳብ እንደተረዳነው ወደ ንስኀ አባት ቀርበው ንስኀ ገብተዋል፤ ቀኖናም ተቀብለዋል፤ ቀኖናዎትንም ጨርሰዋል። ነገር ግን የቀረ የረሱት ያልተናገሩት ነገር አለ። ስለዚህ ጠያቂያችን ይሄንን በተመለከተ ቀረ ያሉትን ንስኀ ለካህኑ መንገር ይጠበቅብዎታል። ካህኑ በቅርብ ከሌለ ደግሞ አካባቢዎ በሚያገኟቸው ካህን ለዚህ ለቀረው ንስኀ ላልገቡበት ኀጢአት ብቻ ንስኀ በመግባት ቀኖናውን በአግባቡ መቀበልና መጨረስ አለብዎት። ምክንያቱም ቀኖና የሚሰጠን በፈፀምነው የኀጢአት ደረጃ እና መጠን ተለክቶ ስለሆነ እያንዳንዱን ያጠፋነውን ጥፋት ከባድም ቢሆን ሳንፈራ ፤ ቀላልም ቢሆን ሳንንቅ ለካህኑ መናገር እንዳለብን  በቀኖና ቤተክርስቲያን ተደንግጓል። ስለዚህ ጠያቂያችን ምንም መፍራት የለብዎትም፤ ይልቁንስ እርስዎ እንዳሉት ህሊና ንፁህ ካልሆነና ካልፀዳ ያ ህሊና በእኛ ውስጥ ያለ የእግዚአብሔር ድምፅ ነውና ይጠይቀናል። ህሊና ትልቁ ዳኛ ነው።  ህሊና ይገስፃል፣ ይወቅሳል፣ ይዘልፋል፤ እኛም ልንሸነግለውና ፀጥ ልናሰኘው የማንችለው ህሊናችንን በመስማት መፈፀም ይኖርብናል፤ ነጻ ስንሆንም እንደዚሁ ህሊናችን ይነግረናል ።

ስለዚህ ህሊናችን እያወቀ መናዘዝ አለብን ፤ ቀኖና መቀበል ስላለብን ይህን ለካህን ሄደን መናዘዝና ቀኖናን ተቀብለን በአግባቡ መጨረስ መቻል አለብን። ይህም ፍፁም የመንፈስ ቅዱስ ማደርያ እንድንሆን ነው፤ ፍጹም እግዚአብሔር ከእኛ ጋር እንዲሆን ነው፤ ከንስኀ በኋላ እግዚአብሔር ልጆቼ እንዲለን ነው፤ የጠፋነው ልጆች ወደ እግዚአብሔር መመለስ የምንችለው እኛ ቀኖናውን በአግባቡ ስንጨርስ መንፈስ ቅዱስ ከላይ ከሰማይ ይወርዳል፣ ልጆቹን እንደገና እንደ አዲስ ይጎበኘናል የጥበብ ሁሉ ምንጭ ባለቤት ያደርገናል፣ ልጆቼ ብሎ በአባት አይን ያቅፈናል ማለት ነውና ንስኀ ገብተው ቀኖናዎን በአግባቡ እንዲጨርሱ እንመክራለን። 

አንድ ሰው ለበደለው በደል እራሱ ነው ቅጣቱን መቀጣት ያለበት። አዳም በበደለው በደል ቀኖናውን የጨረሰው እሱ ነው። አንድ ወንጀል የሰራ ሰው ወደ ወህኒ ቤት የሚገባወ እራሱ ነው እንጂ እኔ ልግባ ብሎ የሚያልፍ ሰው መኖር የለበትም። በዚህ አንፃር ካህኑ ልጁን ‘አንተ የአቅምህን ይሄን ይሄን ጹም፣ ጸልይ እኔ ደግሞ የራሴን ድርሻ አደርጋለሁ’ የሚል እንጂ ፤ ‘ይሄን ይሄን አድርግ ሌላውን እኔ አደርግልሀለሁ’ የሚል አባት ከሆነ እኝህ አባት ወይ ፍፁም መንፈሳዊ መሆን አለባቸው ፥ ወይም ደግሞ ያ ንስኀ የገባው ሰው በአልጋ ቁራኛ በደዌ ዳኛ የተያዘ ከሆነ፣ በሽተኛ ከሆነ፣ መስገድና መፆም የማይችል በጣም ደካማ ከሆነ፦ በእርግጥም አባቱ ‘አንተ ይሄን ይሄን እያደረግክ ኀጢአትህን አብሰልስለው፣ ኀጢአትህ በጣም ከባድ ነው፤ እግዚአብሔር እንዲምርህ እኔ የድርሻዬን እንዲህ አደርጋለው ፤ አንተ ደግሞ የድርሻህን እንዲህ አድረግ’ የሚሉ አባቶች ሊኖሩ ይችላሉ። ነገር ግን ከዚህ ውጪ አንዳንዴ ሀብታም ስለሆኑ ወይም ከተማ ላይ ነጋዴዎች ስለሆኑ በሚል ‘በል እኔ እፆምልኀለሁና አንተ ይሄን ገንዘብ ክፈል’ የሚሉ አባቶች ካሉ ይሄ ውንብድና ነውና እውነተኛ አባቶችን ቀርቦ መጠየቅ ያስፈልጋል ። ‘ስራ ስለሚባዛብኝ’ ወይም ‘የንግድ ስራ ስለሚበዛብኝ’ ቢል እንኳን ‘አንተ ስራህን ስራ ቀኖናውን እኔ ፈፅምልሀለሁ’ የሚባል ነገር የለም። ምድራዊ ስራ እርግፍ አድርጎ ስለ ነፍስ ድህነት ገዳምም ገብቶ ይሁን ቤትም ዘግቶ ይሁን በፆም በፀሎት ማልቀስ ማዘን አለበት።  ስለዚህ ተገቢነት ካለው አንዳንዴም በጣም ጫን ብሎ ያ ሰው መቀጣት መቻል አለበትና ማስተዋል አለብን።  ስጋችን መድከም መቻል አለበት መጎሳቆል አለበት ፦ አባታችን አዳምን አስቡት ከእኛ የከፋ በደል በድሎ አይደለም እፀበለስን ቆረጠ ፤ የዲያብሎስን ሃሳብ ሰምቶ እውነት መሰሎት አደረገ፥ ተሳሳተ፣ አለቀሰ ፣ ስላለቀሰ ግን ወድያው አልማረውም 5500 ዘመን  ቆየ፣ ያ 5500 ዘመን ደግሞ ደም ደም ያለቀሰበት ጊዜ ነው ፥ እንባው አልቆ ደም እስኪያለቅስ ድረስ ተጸጸተ፥ ቀኖና ማለት እንዲህ ነው ከዚያም በኋላ 5500 ዘመን ሲፈፀም እግዚአብሔር ሊታረቀው መጣ፥ ስጋን ለብሶ መጣ ፥ ‘ልጄ!’ አለው። አባትም እንዲህ ነው ፥ ካህን ልጁ ደም አልቅሶ ስለ ኀጢአቱ ያነባውን እንባ አይቶ በካህኑ አማካኝነት እግዚአብሔር ያቅፈዋል ልክ የጠፋው ልጅ ወደ እቤት እንደተመለሰ አይነት ልጄ ተመልሷል ተፀፅቷል ብሎ ያቅፈዋል። ስለዚህ በዚ መልክ መጸጸትና አብዝተን ሥጋችንን በማድከም ነው መሆን ያለበት እንጂ ሳምንት ሁለት ሳምንት ሦስት ሳምንት እስከ 6 ሰዓት እየተፆመና ምግቡም እየተመረጠ እየተበላ ፥ ይሄም በዛ ቀንሱልኝ ወይ አግዙኝ እየተባለ ቀኖና ተፈፅሟል ንስኀ ተገብቷል ለማለት በጣም ከባድ ነው።  ለዚህ ወደፊት ሰፊ ትምህርት የምንሰጥበት ሆኖ ላሁን ግን ወደ ጠያቂያችን ዋና ሃሳብ ስንመለስ ፤ ‘አንድ ሰው ኀጢአት ከሰራ ማነው ቅጣቱን ሊቀጣ የሚገባው?’ ላሉት፤ ከላይ ባብራራነው መሰረት በአሳማኝ ወይም በልዩ ምክንያት ካልሆነ በስተቀር ሊቀጣ የሚገባው እራሱ ነው። አባቱም የራሳቸውን በድርሻቸው የሚያደርጉትን ለልጁ ላይነግሩት ይችላሉ በድብቅ በስውር ሊፆሙ ሊሰግዱ ይችላሉ። ከዚህ ውጪ ግን ካልቻልክ እኔ እንዲህ አደርግልሃለው አንተ ነግድ፣ በንግድ አለም ወዲያ ወዲህ በል የሚል አባት ግን አባት አይደለምና ሊታሰብበት ይገባል።

ጠያቂያችን የንስኀ ቀኖና እንዴት መቀበል እንዳለብን ከዚህ ቀደም ለብዙ ጠያቂዎቻችን ስለ ንስኀ በሰጠነው ማብራሪያ ምላሽ የሰጠንበት ሲሆን፤ አሁንም ጠያቂያችን መረዳት ያለብዎት ንስኀ እንዲሰጡን ቀርበን የኀጢአታችንን ዝርዝር የነገርናቸው የነፍስ አባታችን እንደ ኀጢአታችን አይነት በጾም፣  ወይም በፀሎት ፣ ወይም በስግደት፣ ወይም በምፅዋት፣ ወይም በጥምቀት፣ ወይም ደግሞ በሁሉም ለንስኀ ህይወታችን ቀኖና እድንንገባ ባዘዙን መሰረት የሚፈፀም ነው። ምክንያቱም እስከ ቄደር ጥምቀት የሚያደርስ የንስኀ አይነት አለና ነው። በመሆኑም ማንኛውም ኦርቶዶክሳዊ ምእመናን ስለ ንስኀ አሰጣጥ የንስኀ ቀኖና ስለምንገባበት መንገድ እኛ በግላችን መጨነቅ የለብንም። የምእመናን ድርሻ ለእግዚአብሔር የሚሰወር እና የሚደበቅ ኀጢአት ሳይኖረን እግዚአብሔር ለሾመው አገልጋይ ወይም ካህን ቀርበን በዝርዝር ማስረዳት ብቻ ነው የሚጠበቅብን። ከዚህ ውጪ በምን አይነት መንገድ ቀኖና ተሰጥቶን ወይም እንዴት አይነት ቀኖና መፈፀም እንዳለብን የመንገር የካህኑ ድርሻ ይሆናል ማለት ነው። ስለዚህ ጠያቂያችን በዚህ እንዲረዱት ይህን አጭር መልዕክት ልከንልዎታል፥ ተጨማሪ ማብራሪያ ከፈለጉ በውስጥ መስመር ሊያገኙን ይችላሉ።